Türkiyə futbolunda özünəməxsus yeri olan və 2010-cu ildə superliqa çempionu olmaqla yeni tarix yazan “Bursaspor” belə desək, əmin addımlarla məhvə doğru gedir.

"Football-plus.az" xəbər verir ki, çempion olandan 9 il sonra, yəni 2019-da elita ilə vidalaşan “Bursaspor” ötən mövsüm 62 illik tarixində ilk dəfə 2-ci liqada, yəni 3-cü divizionda mübarizə apararaq yalnız 16-cı yeri tuta bildi. Amma əvvəlki rəhbərliyin yarıtmaz siyasəti üzündən borc bataqlığında üzən, transfer qadağası ilə üzləşən və yeni oyunçular üçün lisenziya ala bilməyən “timsahlar” tarixin yaddaşına qovuşa bilər. Bunu klubun hazırki başqanı Rəcəp Günayın sözlərindən də anlamaq mümkündü.

Bugünlərdə klubun rəsmi saytında əvvəlki başqan, 2016-19-cu illərdə bu vəzifəni icra etmiş Əli Ayın dönəmində həyata keçirilən qanunsuz transferlər və pul yeyintiləri rəsmi sənədlərlə birlikdə paylaşılmışdı. Rəcəp Günayı dinləyək: “Transfer qadağasını heç cür aradan qaldıra bilmirik. Bu üzdən yeni transferlər üçün lisenziya almağımız mümkün deyil. Bu yay əsas komandaya və akademiyaya qatdığımız yeni futbolçuların heç birinə lisenziya ala bilmirik. Düzdü, qarşıdakı mövsüm 2-ci liqada oynayacağıq. Bu dəqiqdi. Mövcud lisenziyalı oyunçularımızla da olsa, turnirdə iştirak edəcəyik. Amma bu gedişlə gələn yay iş çıxılmaz həddə çatacaq. Çünki bir çox oyunçuların müqavilə müddəti bitəcək. O vaxta qədər transfer qadağası götürülməsə, TFF-dən heç bir oyunçumuz üçün lisenziya ala bilməyəcəyik. Belə olsa, heç bir turnirə qatılmayacağıq”.