Dünən AÇ-2024-ün final mərhələsinin böyük səbirsizliklə gözlənilən püşkatma mərasimi keçirildi.

"Football-plus.az" xəbər verir ki, mərasim Almaniyanın Hamburq şəhərində yerləşən ''Elb Filarmoniyası'' konsert zalında baş tutdu. Amma bütün dünyanın diqqət mərkəzində olan tədbirin gedişində tarixi və utancverici bir qalmaqal yaşandı. Belə ki, püşkatmanın ən maraqlı yerində salondan erotik səslər gəlməyə başladı. Təxminən 2 dəqiqədən çox davam edən bu qəribə səslər sosial şəbəkələrdə əsas gündəm mövzusuna çevrildi. Almaniyanın baş məşqçisi Yulian Naqelsmann başda olmaqla bəzi mütəxəssislərin bu hadisəni gülüşlə qarşılaması diqqətdən qaçmadı. Bir ara qısa müddətə səs kəsildi. Həmin an səhnədə olan UEFA-nın baş katibi Corcio Marketti ''artıq səs kəsildi'' deməsinin ardından erotik səslər yenidən eşidilməyə başlandı. Bu da yenidən gülüşmələrə səbəb oldu. Amma çox keçmədən bu tarixi qalmaqalın səbəbinin üstü açıldı. Bu, məhşur pranker, ''Jarvo69'' kimi tanınan Daniel Carvisin ''əl işi'' imiş. Daha öncə dəfələrlə önəmli idman tədbirlərində ''çağırılmamış qonaq'' qismində meydana çıxmaqla videoçarxlar çəkən Carvis ötən il Parisdə baş tutan ÇL-in finalından sonra, eləcə də Cənubi Afrikanın Fransada keçirilən reqbi üzrə dünya kobukunun qalibi olmasından sonra da meydana çıxmışdı. Erotik səslərə gəlincə, o, daha öncə bu oyunu Qari Lineker ilə Alan Şirerin başına açmışdı. Ötən il BBC-nin studiyasında bu iki əfsanə ''Liverpul'' - ''Vilverhempton'' oyununu şərh edərkən birdən-birə canlı yayında erotik səslər eşidilməyə başlanmışdı. Sonradan məlum olmuşdu ki, Carvis studiyada telefonu gizlədibmiş. Həmin telefonun zənginə isə məhz erotik səslər qoyubmuş. Sonra da veriliş davam edərkən telefona zəng vurubmuş. Çox güman o, bu dəfə də eyni ''taktikadan'' istifadə edib.

ƏLİ