Srağagün ölkə kubokunda 2-ci təsnifat mərhələsi start götürdü.

Günün ən məhsuldar oyunu "Şəfa" və "Səbail" arasında oldu. Meydana nominal qonaq qismində çıxan "dənizçilər" 2-ci liqa təmsilçisini 7:0 hesabı ilə darmadağın etdi. "Şəfa"nın baş məşqçisi Əli Əliyev oyundan sonra "Futbol+"in bəzi suallarını cavabladı.

- Oyun haqda danışardız.
- Əvvəlcə qələbə münasibətilə rəqibimizi təbrik edirəm. Həqiqətən də səviyyə öz sözünü dedi. Biz nominal meydan sahibi qismində oynayırdıq. Amma "Səbail" rəhbərliyi kollektivimizi çox yaxşı qarşıladı. Onlara təşəkkür edirəm. Oyuna gəlincə, komandamız gəncdi, heyəti tam formalaşdırmamışıq. İnşallah, yanvardan sonra fərqli "Şəfa" görəcəksiz.
- Oyundan əvvəl mərhələni keçmək şansınızın olduğuna inanırdız?
- Mən uşaqlara rəqiblə başabaş, sona kimi mübarizə aparmağı tapşırmışdım. Futbolçularım meydanda final fitinə qədər döyüşdü. Sübut etdik ki, premyer-liqa təmsilçilərinə qarşı da oynaya bilərik.
- Hazırda mübarizə apardığınız ikinci liqada işləriniz yaxşı getmir. Komandada problem nədi?
- Bəli, hazırda komandada maliyyə problemləri var. Buna görə də istədiyimiz oyunçuları heyətə cəlb edə bilmirik. İnşallah, qışda bunları düzəltməyə çalışacağıq.
- Səhv etmirəmsə, heyətdəki bəzi futbolçular başqa işlə məşğul olduğundan komanda şəklində məşq edə bilmirsiz.
- Bəli, heyətdəki uşaqların bəziləri universitetdə oxuyur, bir hissəsi işləyir. Elə olur ki, məşqə bütün futbolçular qatıla bilmir. Oyunlar olanda isə icazə alırıq. Vallah, mən oyunçuya yaxşı pul versəm, əlbəttə, bütün fikrini futbola yönəldəcək. Təəssüf ki, hər şey maddi durumdan qaynaqlanır.
- Bu mövsüm çempionatı hansı yerdə bitirməyi hədəfləyirsiz?
- Ən azı 6-7-ci yerdə liqanı bitirmək istəyirik. Bunu dəqiq deyə bilərəm ki, "Şəfa" çempionatı sonuncu pillədə başa vurmayacaq.

Şahin Diniyev də matçdan sonra bəzi suallarımızı cavabladı:

- Əvəzedici heyət üzvlərindən razı qaldınızmı?
- Əvəzedici heyətdən gələn oyunçular ümumi ansamblı pozmadı. Amma öz üzərlərində hələ çox çalışmalıdılar. İndi premyer-liqada oynamağa hazı olduqlarını deyə bilmərəm.
- Matç başa çatandan sonra əvvəlcə rəqibin paltardəyişmə otağına yollandız. Bu nə ilə bağlı idi?
- Bəli, “Şəfa”nın paltardəyişmə otağına yollandım. Onlara dəstək oldum. Bildirdim ki, böyükhesablı məğlubiyyətə baxmayaraq, ruhdan düşməsinlər. Bu səviyyədə ilk oyunları idi. Təcrübələri az olsa da, hiss olunurdu ki, komanda futbol oynamaq istəyir. Düşünürəm ki, istiqaməti düz tutsalar, bir müddət sonra daha yaxşı yerlərə gələ biləcəklər.
- Ölkə kubokundakı hədəfiniz nədi?
- Növbəti mərhələdə “Zaqatala” - “Şamaxı” cütünün qalibi ilə qarşılaşacağıq. Rəqibin adı ciddi fərq kəsb etmir. Onsuz da asan oyun olmur. Hər matça ciddi yanaşmalıyıq. Yolumuza dava etmək istəyiriksə, rəqiblər arasında fərq qoymamalıyıq. Kubokda hədəfimiz bacardıqca irəli getməkdi. Əlimizdən gələni edəcəyik ki, bu yarışda maksimum irəliləyək.

Bu oyunda iki qola imza atan Amil Yunanov da bəzi suallarımızı cavabladı.
- Belə hesab olacağını gözləyirdin?
- Əsas heyətin bəzi oyunçuları bu oyunda çıxış eləmirdi. Rəqib də ikinci liqa klubu olduğu üçün zəif idi.Yəni aradakı fərq görünürdü. Əvvəlcədən bu hesabı gözləmək olardı. Amma matça ciddi hazırlaşmışdıq.
- Öz performansın barədə nə deyə bilərsən?
- Normal idi. Ötən həftə çempionat oyununda 20-25 dəqiqə meydanda olmuşdum. Bu qarşılaşmada da 90 dəqiqə mübarizə apardım. İnşallah, oyundan-oyuna daha da yaxşı olacaq.
- Ağabala Ramazanovun zədəli olmasının digər hücumçuların yolunu açdığını demək mümkündü?
- İnşallah, Ağabalanın tez bir zamanda yaşıl meydanlara qayıtmasını gözləyirik. O bizim komandanın əsas silahlarından biridi. Mövqeyimiz fərqlidi. O cinah, mən isə mərkəz hücumçusuyam. Bir də ki, mən fikirləşmirəm, bu oyunçu zədələndi və mənə şans yaranacaq. Öz oyunuma baxıb məşqçinin qərarını gözləyirəm.

CAVİD ƏLİYEV