Kriştiano Ronaldo Səudiyyə Ərəbistanında çıxış edən məşhur futbolçular sırasında öncül mövqeyə layiq bilinib. Asiyanın bu ölkəsində onun muzeyi açılıb.

"Football-plus.az" xəbər verir ki, bu haqda “Əl-Nəssr”in portuqaliyalı hücumçusu özünün sosial şəbəkə hesablarında belə yazıb:

“Bu, mənim hekayəmdi. Madeyradan Səudiyyə Ərəbistanına qədər mənim imzam olan CR7 muzeyim indi Ər-Riyadda açıqdı”.

Ronaldonun fanatları muzeydə onun köynəkləri, şəxsi mükafatları və ayaqqabıları daxil olmaqla xatirə əşyalarının unikal kolleksiyası ilə yaxından tanış ola biləcəklər. Muzeydə həmçinin ulduz futbolçunun möhtəşəm karyerası ərzində qazandığı bir çox kubok və medallar da nümayiş etdirilir. Bu da son deyil: yeni açılan məkanda Kriştianonun mum heykəli də var.

O, “Əl-Nəssr”də bu ilin yanvarından çıxış edir. Ronaldonun klubla müqaviləsinin müddəti 2025-ci ilə qədərdi.