Hazırda zədəsini sağaltmaqla məşğul olan Mario Balotellidən xəbər var.

"Football-plus.az" xəbər verir ki, bilindiyi kimi, birillik “Syon” macərasının ardından sentyabrın orttalarında yenidən “Adana Dəmirspor”a qayıdan təcrübəli forvard noyabrın 16-da dizindən əməliyyat olunub. Bu mövsüm 5 oyuna çıxan və 3 qol vuran “Super Mario” ən azı 2 ay meydana çıxa bilməyəcək. Sonuncu dəfə 2018-də şərəfini qoruduğu İtaliya yığmasına qayıtmaq üçün dəridən-qabıqdan çıxan və hər fürsətdəcə yığmasının məşqçilər korpusundan təklif gözlədiyini dilə gətirən 33 yaşlı futbolçu son açıqlamasında “skuadra adzurra”nın forvardlarına söz atıb. İtaliya AÇ-2024-ün seçmə mərhələsinin son turunda Ukrayna ilə qolsuz bərabərliyə qalaraq böyük çətinliklə final mərhələsinə vəsiqə qazandı. Həmin oyunda mərkəz hücumçusu mövqeyində ilk yarıda Raspadori, ikinci yarıda Skamakka qərarlaşsa da, heç nə ilə yadda qalmadılar. Balotellini dinləyək: “Özümü hələ də İtaliyanın ən güclü hücumçularından biri sayıram. Raspadori və Skamakkanı Ukraynaya qarşı oyunda görmədim. Onlar meydandaydılar? Birlikdə qapıya neçə zərbə vurdular? İki? Zədəmi sağaldandan sonra yenidən yığmadan təklif gözləyəcəm. Spalletti ilə tanışlığım var. Bir neçə dəfə görüşmüşəm. “Napoli”yə qarşı yoldaşlıq oyununda zarafatlaşmışdıq. Amma əlaqəmiz yoxdu”.

Balotelli eyni zamanda həmin matçın son anlarında böyük müzakirələrə yol açan epizod haqda da fikrini bildirib. Mudrik Kristantenin müdaxiləsindən sonra yerə sərilsə də, hakimin penalti verməyə cürəti çatmamışdı. Balotelli həmin epizodda yüz faiz penalti olduğunu vurğulayıb. Amma onu da qeyd edib ki, Donnarumma zərbəni dəf edəcəkdi...

Yeri gəlmişkən, dünən təcrübəli oyunçudan üzücü xəbər gəlib. Belə ki, Mario maşın sürərkən idarəetməni itirib və qəzaya düşüb! Hadisə dünən İtaliyanın Breşiya şəhərində yerli vaxtla səhər saat 8.30 radələrində baş verib. Maşına ciddi ziyan dəysə də, futbolçu özü hadisədən xəsarət almadan qurtulub. Hadisə şahidlərinin sözlərinə görə, Balotelli maşından çıxaraq axsaya-axsaya tibbi yardım maşınına əyləşib. Bundan başqa, o, içkili vəziyyətə olub-olmadığını müəyyənləşdirən testdən keçməkdən imtina edib. “Adana Dəmirspor”un hadisə ilə bağlı açıqlamasında bunlar qeyd olunub: “İtaliyada maşın qəzasına düşən oyunçumuz Mario Balotellinin vəziyyəti normaldı. Hazırda evində istirahət edir və heç bir sıxıntısı yoxdu”.