''Adana Dəmirspor''un heyətində əla mövsüm keçirən və 33 rəsmi oyunda 19 qol, 6 məhsuldar ötürmə ilə yadda qalan Mario Balotelli İtaliyaya qayıtmaq istədiyini bildirib.

"Football-plus.az" xəbər verir ki, baxmayaraq ki, onun bu klubla hələ 2024-cü ilə qədər müqaviləsi var və adanalıların başqanı Murat Sancak da bir müddət öncə ulduz futbolçunun komandada qalacağını açıqlamışdı. Son günlər İtaliya mətbuatında ''Super Mario''nun sabiq klubu ''Montsa''ya qayıda biləcəyi ilə bağlı xəbərlər peyda olmuşdu. Silvio Berluskoninin prezidenti olduğu ''Montsa'' son mövsümün nəticələrinə görə ''Leççe'' və ''Kremoneze''dən sonra A seriyasına vəsiqə qazanan 3-cü kollektiv olub. Srağagün klub bu münasibətlə tədbir təşkil edib və orda Balotellinin də iştirakı diqqəti çəkib. 31 yaşlı futbolçu tədbirin gedişində italiyalı həmkarlarımıza bunları deyib: ''Özümü fiziki və psixoloji cəhətdən əla hiss edirəm. ''Adana Dəmirspor''da çox yaxşı mövsüm keçirdik. İtaliyaya dönmək istəyirəm. Bunun ''Montsa'' ilə baş verib-verməyəcəyini zaman göstərəcək. Bundan başqa, yenidən yığmaya çağrılmaq da ən böyük arzularımdan biridi''. 85 yaşlı Berluskoni isə geniş açıqlama verməkdən çəkinərək yalnız ''Balotelli yenidən bizim komandaya gəlib A seriyasında oynamaq istədiyini dedi'' ifadəsi ilə kifayətləndi.

Xatırladaq ki, Balotelli 2020/21 mövsümünün qış fasiləsində azad agent statusunda ''Montsa'' ilə 6 aylıq müqavilə imzalamış və bu klubda B seriyasında 14 oyuna 6 qol vurmuşdu. ''Montsa'' həmin vaxt A seriyasına yüksəlsəydi, Balotellinin müqaviləsi avtomatik yenilənəcəkdi. Amma Berluskoninin komandası bu hədəfə çatmadığından məşhur futbolçu karyerasını Türkiyədə davam etdirmək qərarına gəlmişdi.