A seriyasının 13-cü turunda maraqlı hadisə baş verə bilər.

"Football-plus.az" xəbər verir ki, “Milan”ın baş məşqçisi Stefano Pyoli 15 yaşlı mərkəz hücumçusu Françesko Kamardanı “Fiorentina” ilə keçiriləcək oyuna çağırıb.

Bu barədə İtaliyanın “Sport Mediaset” nəşri məlumat yayıb. Pyoli komandasında bir sıra hücumameyilli oyunçuların zədəli və cəzalı olması səbəbindən çempionat matçında hücumun mərkəzində yalnız Luka Yoviçə güvənə bilər. Bu səbəbdən aşağı yaş qrupundan Kamarda “Fiorentina” ilə oyun üçün əsas komandaya dəvət alıb. O, bu matçda iştirak edəcəyi halda A seriyasının tarixinə ən yeniyetmə futbolçu kimi düşəcək. Yeri gəlmişkən, bu planda rekord “Bolonya”nın müdafiəçisi Uizdom Ameyə məxsusdu. O, 15 yaş 274 günlüyündə “Cenoa” ilə matçda meydana çıxıb.

Kamardaya gəlincə, onun yeniyetmələrin yarışında keçirdiyi 89 matçda 485 qol vurduğunu bildirək. Françesko bu mövsüm “Milan”ın yeniyetmələr komandasının heyətində 13 matçda iştirak edib, 7 qol vurub və 2 məhsuldar ötürmə verib.