"Kəpəz"in sabiq baş məşqçisi Azər Məmmədovun istefasından sonra köməkçilərinin də işsiz qaldığını bilirsiz. Siyahıda Etibar İbrahimov, Tariyel Hüseynov, İlkin Verdiyev və Vasif Əliyev var.

"Football-plus.az" olaraq, onların indiki durumuyla maraqlandıq. Araşdırma zamanı məlum oldu ki, mütəxəssislərdən biri "Kəpəz"dən ayrılmayıb. Əksinə, yeni vəzifəyə təyin edilib.

Azər Məmmədov istirahətə davam edir. Düzdü, son günlərdə mütəxəssisin adı "Səbail"lə hallanır. Lakin nə klubdan onunla əlaqə saxlanılıb, nə də o, işləmək niyyətindədi. Görünür, sonuncu iş yerində yaşananlar onu xeyli yorub, bu üzdən dincəlməyə ehtiyac duyur. Xatırladaq ki, Azər bəy istefa verəndən sonra bizimlə söhbətdə aşağı liqada işləmək istəmədiyini demişdi. Bununla yanaşı, o, İdarə Heyətinin sədri İlqar Nadirinin idman direktoru kimi klubda fəaliyyət göstərmək istəyini qəbul etməmişdi.

Etibar İbrahimov da işsizdi. Bir neçə klubdan təklif alsa da, şərtlər onu qane etmir. Buna görə də gözləməyi və gələcəkdə daha sərfəli iş yerində çalışmağı üstün tutur.

Tariyel Hüseynovun durumu da eynidi. Mütəxəssis sərfəli təklif gözləyir.

İlkin Verdiyev "Kəpəz"də analitik məşqçi vəzifəsini davam etdirir. Buna səbəb Gəncədə bu ixtisas üzrə kadr çatışmazlığının olmasıdı. Maraq üçün qeyd edək ki, indi yeni baş məşqçi Adil Şükürova kömək edən İlkin bəy Etibar İbrahimovun yetirməsi sayılır.

Vasif Əliyev isə "Kəpəz" akademiyasının əlaqələndiricisi vəzifəsinə təyin olunub.

KƏNAN BAHADIR