Məlum olduğu kimi, srağagün Türkiyə yığması AÇ-2024-ün seçmə mərhələsinin son oyununda səfərdə Uelslə qarşılaşdı.

“Football-plus.az” xəbər verir ki, “ay-ulduzlular” Kardiffdə yaxşı təsir bağışlamasalar da, qarşıya qoyulan minimum hədəfə nail olaraq 1 xal qazandılar və qrupu lider kimi tamamladılar. Matçdan sonra türkləri Kardiffdən İstanbula gətirməli olan təyyarədə qanqaraldıcı olay yaşandı. Belə ki, baş məşqçi Vinçentso Montellanın qardaşı Emanuelenin vəziyyəti qəfil pisləşdi. Bu üzdən təyyarə Münhen hava limanına məcburi eniş etməli oldu! Türkiyə yığmasına cavabdeh yönətici Həmit Altıntop, eləcə də yığmanın baş həkimi və Vinçentso Montella qardaşı Emanuele ilə birlikdə təyyarədən ayrılaraq Münhendəki xəstəxanalardan birinə yollandı. Daha sonra təyyarə Bakı vaxtı ilə təxminən saat 10.00-da Münhendən ayrıldı və 12.30-da İstanbul hava limanına endi. Burda federasiya prezidenti Mehmet Büyükekşi ayaqstü jurnalistlərlə söhbət etdi. Həm baş vermiş hadisə, həm də Türkiy yığması haqda danışan Büyükekşi bunları dedi: “Təyyarədə birdən-birə Emanuele Montellanın təzyiqi aşağı düşdü. Həkimlərimiz ona ilkin müdaxilə ilə yardım etməyə çalışdılar. Bir az gözlədilər. Amma durumunda yetərli qədər irəliləyiş olmadı. Bu üzdən təcili Münhendə enməli olduq. Həmit Altıntop və həkimimiz ilə birlikdə xəstəxanaya yollanaraq onu müayinədən keçirdilər. Şükürlər olsun ki, ciddi problem aşkarlanmadı. Artıq xəstəxanadan çıxıblar. Bir qədər dincələndən sonra Romaya yollanacaqlar. Həmit Altıntop da sonrakı təyyarə ilə İstanbula gələcək. Yığma komandamızın çıxışına gəlincə, çox sevincli və qürurluyuq. Tariximizdə ilk dəfə qrupdan lider kimi çıxdıq. Həmişə biz qrup mərhələsinin sonlarını narahat keçirirdik. Bu dəfə bu durumu rəqiblərimiz yaşadı. Allah bu günləri də bizə nəsib etdi. Biz əslində yığmada daha öncədən dəyişiklik etməyi planlaşdırırdıq. Bizə yönələn tənqidlər əsasən ondan ibarət idi ki, komandamız səviyyəli olsa da, sərgilədiyi oyun bu səviyyəyə uyğun deyildi. Montella daha öncə Türkiyədə işlədiyindən zatən onu əvvəlcədən tanıyırdıq. Hələ martda məşqçi dəyişikliyinə getmək barədə çox ciddi düşündük. Sonra bir qədər gözlədik və ardıcıl iki qələbə qazandıq. Amma Ermənistan və Yaponiya ilə oyunlardakı uğursuzluq azmış kimi, əvvəlki məşqçinin futbolçularla bağlı mənfi açıqlamalar verməsindən sonra dəyişiklik etmək qərarına gəldik. Montella hörmətəlayiq məşqçidi. 4 oyunda 3 qələbə, 1 heç-heçə çox yaxşı göstəricidi. Onunla gözəl bir başlanğıca imza atdıq. Artıq bundan sonrakı hədəf AÇ-də uğur qazanmaqdı. İndidən fanatlarımız üçün AÇ-2024-ə 50 min forma sifariş vermişik. Bu komandanın tək seçmə mərhələdə yox, final mərhələsində də uğur qazanmağa potensialı var. Bu arzunu həyata keçirə biləcək gücdəyik. Gənc və səviyyəli komandamız var. Yeni ulduzlarımız da yetişir. Özü də son matçlarda 6-7 futbolçumuz yox idi. AÇ-də bacardığımız qədər irəliləməyə çalışacağıq. Kapitanımız Hakan Çalhanoğlunu da təbrik edirəm. 3-cü övladı dünyaya gəlib”.