Canni de Byazi dünənə qədər yığmamızın baş məşqçisi idi. Bundan sonra onun haqda danışası olsaq, “sabiq” sözündən istifadə edəcəyik.

Hələ ki AFFA İcraiyyə Komitəsinin onu vəzifəsindən azad etməsinin doğru addım olub-olmadığı barədə danışmaq tezdi. Çünki hər şey italiyalı mütəxəssisin sələfindən asılı olacaq. Düzdü, AFFA-nın prezidenti Rövnəq Abdullayev Belçika ilə matçdan əvvəl “gəlin, De Byazinin “fatihəsini oxumaq” əvəzinə ona uğurlar arzulayaq” demişdi. Lakin İcraiyyə Komitəsinin iclasından sonra bəlli oldu ki, “qoca” “fatihə”sini elə özü “oxuyub”. Daha dəqiq desək, üzvlərə macal vermədən, iştirakçılara Azərbaycanda çalışmaq istəmədiyini bildirib.

Komitə üzvü Vaqif Sadıqovla söhbətdə həm bu, həm də toplantıda müzakirə edilən başqa məsələlər haqda danışdıq.

- De Byazi iclası erkən tərk etdi. Otağa daxil olandan cəmi 10 dəqiqə sonra arxa qapıdan çıxıb getdiyini gördük. Toplantının başlanğıcında nələr yaşandı?
- Onun tez getməsi normaldı. Hələ hesabat vermədən dilə gətirdi ki, Azərbaycanda çalışmaq istəmir. Bizə sonrakı planları haqda məlumat verdi. Daha sonra, hesabatını dinlədik. Nəticələrdən, qazandığı bəzi “uğurlardan” danışdı. Komandanın bəzi istiqamətlərdə inkişaf ediyini dedi. Onunla söhbət bitmişdi. Daha çox qalmasının heç kimə faydası yox idi. Yığmamızın ümumi mənzərəsi bəs etdi ki, onunla əməkdaşlığı dayandıraq.

- De Byazi bir neçə dəfə millimizə qələbə qazandırıb. Xüsusilə İsveç üzərindəki qələbə möhtəşəm alındı. Belə amillər fonunda siz hansı addımın tərəfdarı idiz? Qalmasının, yoxsa getməsinin?
- Əlbəttə, getməsinin! Mən heç onun Azərbaycana gəlməsinin də tərəfdarı olmamışam. Bütün müsahibələrimdə ona qarşı olduğumu, millini yerli mütəxəssislərin çalışdırmasını istədiyimi demişəm. Ümumiyyətlə, De Byazinin müqavilə müddəti indiyə qədər artırılmamalıydı. Məncə, bunu özü də hiss etmişdi. Ona görə də getmək istədiyini dedi. Baş məşqçi futbolçuların, azarkeşlərin, mətbuatın və futbol ictimaiyyətinin dəstəklədiyi biri olmalıdı. De Byazi isə özünü sevdirə bilmədi. Qalsa belə, burada davam etmək çox çətin olacaqdı.

- İclasda konkret hansı mövzular müzakirə edildi?
- Ən vacib məqam işçi qrupun yaradılması oldu. Qərara alınıdı ki, tezliklə bir neçə namizəd üzərində müzakirə aparıb İcraiyyə Komitəsinə təqdim edilsin. Strateji addımlar zamanı həmin şəxslərin məsləhətləri nəzərə alınmalıdı.

- İtaliyalı vaxtilə böyük ümidlərlə təyin olunmuşdu. Lakin 3 il ərzində gözləntilər qarşılanmadı. Demək olar ki, hər kəs ondan narazı idi...
- İşə başlayanda De Byazi haqda fərqli fikirdəydik. Sonra başqa mənzərəylə qarşılaşdıq. AFFA-nın prezidenti Rövnəq Abdullayev də daxil olmaqla, hamı ildən-ilə yaxşı nəticələr qazanılacağını gözləyirdi. Təəssüf ki, De Byazi vəzifəsinin öhdəsindən gələ bilmədi. İcraiyyə Komitəsinin iclasında millinin yekun nəticələri qənaətbəxş sayılmadı.

- Sizcə, bundan sonra hansı addımlar atılmalıdı ki, uğursuz nəticələrdən canımız qutarsın?
- Yerli mütəxəssis gətirilməli və ona çalışmaq üçün münbit şərait yaradılmalıdı. Düzdü, bunun üçün gecikmişik. İndiki duruma düşməmək üçün çoxdan işlər görülməliydi. Məncə, vaxt var. Çox güman, İcraiyyə Komitəsinin növbəti iclasında millinin baş məşqçisi vəzifəsi üçün bir neçə namizəd irəli sürüləcək. Adlarını açıqlamaq istəmirəm, amma bir neçə yerli mütəxəssis var ki, onlar millini çalışdıra bilər. Bizim dünya futbolu ilə ayaqlaşan məşqçilərimiz var. Bunu görürəm. Sadəcə, düzgün seçim etməliyik.

KƏNAN BAHADIR