Bu gün 21 yaşadək futbolçulardan ibarət yığma AÇ-2025-in seçmə mərhələsində növbəti matçına çıxacaq.

"Football-plus.az" xəbər verir ki, Samir Əliyevin rəhbərlik etdiyi kollektiv Ukrayna ilə qarşılaşacaq. Görüş canlı yayınlanmayacaq.

Avropa çempionatının seçmə oyunu
Ukrayna – Azərbaycan
Hakimlər: İRAKLİ KVİRİKAŞVİLİ, Giorgi Elikaşvili, Davit Çiqoqidze, Giorgi Avazaşvili (hamısı Gürcüstan).
21 noyabr. İspaniya. Mursiya. Nueva Kondomina. Saat 22.00.

Ukrayna bu qrupun lideridi. Komanda 4 oyunun hamısında qələbə qazanıb. Unay Melqosanın rəhbərlik etdiyi kollektiv bu görüşdə də qalib gəlmək istəyir. İspaniyalı mütəxəssis ölkəsində keçiriləcək görüşün favoritidi. Samir Əliyevin komandası da formadadı. 21 yaşadək futbolçulardan ibarət yığmamız ardıcıl 2 oyunda qələbə qazanıb. Seçmə mərhələdə Lüksemburqu üstələyən komanda yoxlama matçında da latışları məğlub etdi. Azərbaycan bu görüşdə də qələbə qazansa, sensasiyaya imza atmış olacaq. Komandamız İspaniyadakı qarşılaşmada qələbə qazanaraq qrupdan çıxmaq iddiasını ortaya qoya bilər.

Samir Əliyevi yığmaya çağırdığı futbolçuları nəzərə alaraq komandamızın Ukraynaya qarşı keçirəcəyi oyunun təxmini heyətini təqdim edə bilərik. Qapıda “Qarabağ”ın üzvü Amin Ramazanov dayanacaq. Müdafiənin solunda Rüfət Əhmədov çıxış edəcək. Mərkəzdə Mahir Həsənovla Süleyman Damadayev oynayacaq. Sağ cinahda “Araz-Naxçıvan”ın əsas heyət üzvü Abdulla Rzayev top qovacaq. Yarımmüdafiənin dayağında Fərid Yusifli ilə Veysəl Rzayev yer alacaq. Sol cinahda Samir Nəsirli, sağda Samir Abdullayev vingerlik edəcək. Komandanın pleymeykeri Murad Vəliyev olacaq. Hücumdakı qol ümidimiz isə Camal Cəfərov olacaq. Təbii ki, son seçimi Samir Əliyev edəcək. Amma bu heyəti komandamızın son 3 matçına uyğun olaraq formalaşdırmışıq.

Bu gün bu qrupda daha 2 oyun keçiriləcək. Serbiya Lüksemburqu, İngiltərə Şimali İrlandiyanı qəbul edəcək.

1. Ukrayna 4 4 0 0 11-2 12
2. İngiltərə 4 3 0 1 17-4 9
3. Serbiya 4 2 0 2 5-13 6
4. Azərbaycan 3 1 0 2 3-5 3
5. Luksemburq 5 1 0 4 3-13 3
6. Ş.İrlandiya 4 1 0 3 2-4 3