“Artıq bu yolun geri dönüşü yoxdu”
Türkiyə Futbol Federasiyasının prezidenti Mehmet Büyükekşi başıbəlalı superkubok matçı ilə bağlı yeni açıqlamalar verib.
“Football-plus.az” xəbər verir ki, bilindiyi kimi bu il superkubok uğrunda oyunda ötən ilki çempion “Qalatasaray” ilə kubokun qalibi “Fənərbaxça” üz-üzə gələcək. Əzəli rəqiblərin böyük səbirsizliklə gözlənilən bu duelinə Səudiyyə Ərəbistanı ev sahibliyi edəcək. Görüş Kriştiano Ronaldonun komandası “Əl-Nəssr”in ev oyunlarını keçirdiyi “Kral Səud Universiteti Stadionu” və ya yeni adı ilə “Əl-Əvvəl Park” adlanan arenada baş tutacaq. TFF əvvəlcə oyunun dekabrın 30-da keçiriləcəyini açıqlasa da, sonradan oyun 29 dekabr tarixinə keçirildi. Amma əsas problem bu deyil. Əsas problem ondadı ki, bu matçı Səudiyyə Ərəbistanında nə “Qalatasaray” oynamaq istəyir, nə də “Fənərbaxça”! Məlum olduğu kimi bu il Türkiyə cümhuriyyətinin yaradılmasının yüzillik yubileyi qeyd olunur. Bu üzdən hər iki nəhəng camiə belə bir dönəmdə superkubok matçının “Atatürk Olimpiya”da oynanılmasını istəyir. Hər iki klub bununla bağlı TFF-yə rəsmi müraciət də ünvanlayıb. Büyükekşi məsələ ilə bağlı son durumu “Radyospor”a açıqlayıb. Onun sözləri çətin ki, hər iki camiənin xoşuna gəlsin:
“Hər iki komanda da məkan seçimini bizə etibar edib. Biz federasiya olaraq onlardan “sizə əlavə gəlir qazandırmaq istəyirik, razısımı” deyə soruşduq. Əli Koç da, Dursun Özbək də “razıyıq” dedilər. Bundan sonra danışıqlara başlamaq istəyən TFF hər iki klubdan da razılıqla bağlı yazılı bir sənəd aldı. Yəni onlar seçim hüququnu bizə verdilər. Ona görə də biz rahatıq. Onlar “bunu bizdən xəbərsiz etdilər”, “biz razılıq vermədik” kimi bəhanələr ortaya ata bilməzlər. Avqustdan bu yana hər iki klub superkubokun harda oynanılacağını bilirdi! Ona görə də indi nə üçün bu cür açıqlamalar verdiklərini anlamıram. Biz də onların razılığını aldıqdan sonra təklifləri bir-bir dəyərləndiməyə başladıq. 4 ölkədən – Almaniya, İngiltərə, Səudiyyə Ərəbistanı və Azərbaycandan təkliflər var idi. Əvvəlcə Almaniya ilə İngiltərənin üzərində durduq. Amma təhlükəsizlik problemləri üzündən onlardan vaz keçməli olduq. Çünki oralarda təhlükəsizliyi tam olaraq təmin edə bilməyəcəkdik. Elə həmin ölkələr də bizə təhlükəsizliklə bağlı tam zəmanət verə bilmədilər. Digər iki ölkə arasında ən sərfəli təklif Səudiyyə Ərəbistanından gəldiyi üçün üstünlüyü onlara verdik. Bu dəqiqə dünyanın gözü məhz ordadı. Çünki ən yaxşı oyunçuları transfer ediblər. Üstəlik DÇ-2034-ə ev sahibliyi etmək və iddialı bir komanda qurmaq istəyirlər. Bütün bunları nəzərə alaraq onların təklifini qəbul etdik. Bundan başqa Səudiyyə Ərəbistanının bizə digər turnirlərlə bağlı da bir təklifi oldu. Kubokun həlledici mərhələsinə, yəni “dördlər finalı”ına ev sahibliyi etmək istəyirlər. Ortada 50-100 milyon avrluq təklif var. İspaniyada kubok məhz bu cür sistemlə keçirilir. Onların təklifi bu mövsüm üçün yox, gələn mövsümdən keçərlidi. Hələ ki, düşünürük və yekun qərarı verməmişik. Məncə, həm “Fənər”in, həm də “Qalatasaray”ın narahatlığı odu ki, qısa müddət ərzində iki dəfə qarşılaşacaqlar. Dekabrın 24-də superliqada da üz-üzə gələcəklər. Hərəsi bir qələbə qazansa, problem olmayacaq. Amma hər iki oyunu da uduzan komandanın baş məşqçisi ciddi sıxıntılar yaşayacaq. Artıq bu yolun geri dönüşü yoxdu. Müqavilələr imzalanıb və anlaşma qüvvədədi. Superkubok matçı dekabrın 29-da Səudiyyə Ərəbistanında keçiriləcək! Bir həftədə iki derbi izləyəcəyik”.
Digər xəbərlər
