TFF AFFA-nı yox, pulu və imici seçdi!
Türkiyə klubları “Qalatasaray"la "Fənərbaxça" arasında keçiriləcək Superkubok matçının Səudiyyə Ərəbistana təyin edildiyini xəbər vermişdik.
Türkiyə Futbol Federasiyasının prezidenti Mehmet Böyükekşi səbəbi belə izah etmişdi:
“Oyunun Səudiyyə Ərəbistanında keçirilməsi təkcə maddiyyata görə deyil, imic baxımından da çox önəmlidi. Orada Neymar və Kriştiano Ronaldo kimi ulduzlar oynayır. Öncə Almaniya və İngiltərə ilə danışdıq. Onlar təhlükəsizliyi əsas gətirərək imtina etdi. Heç bir Avropa ölkəsi bu yöndə bizimlə razılaşmadı. Düzdü, Azərbaycan “gəlin bizdə oynayın” dedi. Ancaq orda pul yoxdu”.
Bəs AFFA və TFF arasında baş tutan danışıqlar zamanı nələr müzakirə olunub? Qarşı tərəf qardaş əlini uzadan ölkənin təklifindən niyə imtina edib?
Sualımızı AFFA-nın mətbuat xidmətinin rəhbəri Elnur Məmmədliyə ünvanladıq. Qurum rəsmisi “Football-plus.az”a bunları dedi:
“TFF ilə ilkin danışıqlar olsa da, detallar geniş müzakirə edilmədi. Yəni matçın hansı şərtlər daxilində Azərbaycanda keçirilməsini dəqiqləşdirə bilmədik. Mehmet Büyükekşinin dediklərindən anlaşılır ki, böyük ehtimalla əlavə pul istənilib. Bizim isə bu yöndə təklifimiz olmamışdı”.
Görünür, TFF məhz pul və imic üzündən AFFA-nın təklifini qəbul etməyib. Həmçinin razılaşma Səudiyyə Ərəbistanına da sərf edir. Çox güman, ərəblər bunun qarşılığında Türkiyədən DÇ-2034-ün ölkələrində keçirilmə təşəbbüsünü dəstəkləməsini istəyəcək. Xatırladaq ki, AFFA artıq bu yöndə dəstəyini ifadə edib.
KƏNAN BAHADIR
Digər xəbərlər
