"Azərreyl" Çağırış kubokunun 1/16 final mərhələsinin cavab görüşündə İspaniya təmsilçisi "Avarka de Menorka"nın qonağı olacaq.

Sabahkı matçla bağlı rəqibin 27 yaşlı braziliyalı voleybolçusu Marsella Amaral "Football-plus.az"a eksklüziv müsahibə verdi.

- "Azərreyl"lə oyuna necə hazırlaşırsız?
- Azərbayacana uzun səfərin ardından ölkə çempionatında oyunlar keçirdik. Bizim üçün ağır oldu. Buna baxmayaraq, belə proseslərə tez uyğunlaşa bildik. İndi bütün diqqətimizi avrokuboklara yönəltmişik. Hazırlıq yaxşıdı, hədəf turu keçməkdi.

- Bakıda məğlub olmağınıza səbəb nə idi?
- "Azərreyl" kimi güclü kollektivə qarşı oynamaq yüksək konsentrasiya və intensivlik tələb edirdi. Bəzi detalları düzəltmək və tam diqqətlə oyuna hazırlaşmaq üçün iki məşqimiz qalıb. İndi Bakıdakı səhvləri İspaniyada etməməliyik.

- Bu mərhələni keçəcəyinizə inanırsız?
- Hələ ki heç nə bitməyib. Qalib gəlib turu keçmək şansımız var. Mümkün qədər diqqətli olmalıyıq. Evdə oynayırıq, azarkeşlərimizin dəstəyi də bizim üçün önəmlidi. Geridönüş edəcəyimizə inanırıq.

- Hansı amillər sizin növbəti mərhələyə keçməyənizə şərait yarada bilər?
- Az səhv edən oyunu qazanacaq. Eniş yaşadığımız anlar oldu. Rəqib də bəzi məqamlarda bundan istifadə etdi. Üstünlüyümüz evdə oynamağımızdı. Heyətimizdə elə təcrübəli oyunçular var ki, setlərin sonunda matçın taleyini dəyişə bilər. Yüz faiz inanıram ki, qalib gəlib mərhələni keçəcəyik. Əsas odu ki, buna inanaq.

- "Azərreyl"in hansı oyunçusunu bəyəndin?
- Martinesə Bakıdakı oyunda heyran oldum. Çox yaxşı keyfiyyətlərə malikdi. Braziliya çempionatında da ona qarşı oynamışam. Əla oyunçudu.

CAVİD ƏLİYEV