Əsgər Abdullayev: "Arenanın bu durumda olması hər iki komandanın oyununa təsir etdi"
"Oyun çox gərgin keçdi. Həm öz komandam, həm də rəqib çox yaxşı təsir bağışladı. "Karvan" əla kollektivdi. Həm onlara, həm də bizə qarşıdakı oyunlarda uğurlar arzu edirəm".
Bu sözləri "football-plus.az"a açıqlamasında "İmişli"nin baş məşqçisi Əsgər Abdullayev dedi. "Çəhrayı pələnglər"in çalışdırıcısı 1-ci liqanın 8-ci turunda "Karvan"la 1:1-lik heç-heçəni şərh etdi. Ə.Abdullayev meydançanın ot örtüyünün durumunun o qədər də qənaətbəxş olmadığını bildirdi:
"Stadionun durumunun yaxşı olması oyunun sürətli keçməsinə səbəb olur. Təəssüflər olsun ki, ot örtüyü ideal durumda deyildi. Meydança çox bərk idi. Normal oyun sərgiləmək üçün daha yaxşı stadionlar olmalıdı".
"İmişli"nin çalışdırıcısı oyun ərzində komandasında zədəlilərin olmasını belə şərh etdi:
"Meydança çox bərk idi. Futbolçular məşqdən sonra bu problemi dilə gətirdi. Ot örtüyünün yaxşı olmaması oyuna öz təsirini göstərdi. Deyəsən, arenanın sulama sistemində də problem var idi. Meydança matçdan öncə sulanmamışdı. Arenanın bu durumda olması hər iki komandanın oyununa təsir etdi. Futbol yerdə oynanılır. Meydanın problemli olması futbolçuların performansına təsir etdi. Hətta onların zədələnməsinə də səbəb oldu".
İLKİN SULTANLI
Digər xəbərlər
