“Bunu həyəcan siqnalı kimi qəbul edirəm”
Dünən 1-ci liqada 8-ci tura start verildi. Diqqəti çəkən oyunlardan biri MOİK - "İrəvan" idi. Qarşılaşma qolsuz bərabərliklə bitdi.
MOİK aşağı dəstədə uduzmayan yeganə komandadı. Ancaq “hərbçilər” son iki turda heç-heçə edib. Onların baş məşqçisi Qəzənfər Abbasovun "Football-plus.az" saytına açıqlaması:
"Çox gərgin oyun keçdi. Həm rəqibin, həm də bizim qol imkanlarımız oldu. Amma şanslardan yararlana bilmədik. 1-ci liqanın səviyyəsi artıb. Hər tur, hər oyun olduqca ağır keçir. Son iki oyunda məğlub olmasaq da, qələbə də qazana bilmədik. Bunu həyəcan siqnalı kimi qəbul edirəm. Çalışacağıq ki, səhvlərimizi aradan qaldıraq. Növbəti turda bizi çətin Saatlı səfəri gözləyir. Rəqib qeyri-sabit çıxış etsə də, çox təhlükəli komandadı. İstənilən rəqibi məğlub edə, xal qopara bilərlər. Odu ki, ehtiyatlı olmalıyıq".
Gənc mütəxəssis güclənməyə də ehtiyac olduğunu dedi:
“Hazırda oyunçu seçimimiz geniş deyil. Bu da oyunlarımıza təsir edir. Ən azı 2-3 yeni oyunçuya ehtiyacımız var. Yanvarda yeni transferlər vacibdi".
ABDULLA İSMAYILOĞLU
Digər xəbərlər
