2012-ci ildən idman jurnalistikasındayam. Amma heç vaxt Ağsu Şəhər Stadionda olmamışdım. Düzdü, səfalı rayonumuza dəfələrlə səfər etmişəm. Amma stadiona baş çəkmək qismət olmamışdı.

Ölkədə 5 günlük tətil elan olunub. Bu səbəbdən də "Futbol+" işıq üzü görmür. Bayram günlərini fürsət bilərək dünən Ağsuya yollandım. Çünki 1-ci liqanın 8-ci turunda "Difai Ağsu" "Mingəçevir"lə üz-üzə gəlirdi.

Hər iki komanda üçün vacib görüş idi. Çünki heç biri yaxşı dönəmini yaşamır. "Difai Ağsu"da vəziyyət daha pisdi. Komanda qələbəyə həsrətdi. Təcrübəli Paşa Əliyevin yerinə gənc Elgiz Kərimlini baş məşqçi təyin ediblər ki, vəziyyəti düzəltsin.

Qonaqlar səfərə sevincək yollanmışdı. Çünki Aran-Mingəçevir Regional Gənclər və İdman İdarəsi kluba avtobus hədiyyə etmişdi. Bu da "şəhərlilər"in müəyyən xərclərdən qurtulması demək idi. Klubun bütün idarəçiləri də Ağsuya təşrif buyurmuşdu. İdarə Heyətinin sədri Nurlan Əhmədov, onun müavini Ruslan Həmidov, idman direktoru Zaur Qarayev və başqaları oyunu stadiondan canlı izləyirdi.

Oyun qonaqların hücumlarıyla başladı. Vidadi Cəfərov, Roman Hüseynov, Elsevər Bəkirzadə kimi premyer-liqa təcrübəsi olan futbolçular ağsululara çətin anlar yaşadırdılar. Elgiz Kərimlinin komandası isə müdafiə olunmaq və topu hara gəldi vurmaq ilə məşğul idi. Düzdü, "qırmızı-qaralar" bəzi hallarda əks-hücuma çıxmaq istəyirdilər, amma yalnız istəyirdilər, bacarmırdılar. Qonaqların bütün cəhdlərinə baxmayaraq, ilk hissədə hesab açılmadı.

İkinci hissənin ilk 15 dəqiqəsini ağsulular daha fəal keçirdi. Hiss olunurdu ki, komanda qələbə qazanmaq istəyir. Lakin Sönməz Quliyevin komandası toparlana bildi. Düzdü, Vidadi Cəfərov mingəçevirlilərin əsəbləri ilə oynayırdı. "Şəhərlilər" görüşün sonlarına doğru hücumların sayını artırdı və 81-ci dəqiqədə qol istəyinə çatdı. Elsəvər Bəkirzadə komandasına qələbə qazandıran qolu vurdu.

Oyun aşağı-yuxarı 1-ci liqa səviyyəsində idi. Maraqlı məqam odu ki, tətil olmasına baxmayaraq, stadionda adam yox idi. Ağsu kimi rayonda 60 nəfərin oyunu izləməsi qəbulolunmaz haldı. Görünür, "Difai Ağsu" hələ də ağsululara özünü sevdirə bilməyib. Yəqin ki, komandanın uğursuz çıxışı da buna təsir edən əsas amildi.

Xoş məqamlardan biri Ağsu Şəhər Stadionu ilə bağlıdı. Arenanın tribunalarının vəziyyəti o qədər də yaxşı deyil, ot ürtüyü sunidi. Lakin stadionda işıqlandırma sistemi və elektron tablo var. Oyun zamanı maraqlı məlumat da əldə etdim. AFFA prezidenti təzəlikcə bu rayona səfər edib və arenanın durumu ilə maraqlanıb. Stadionun yanvardan təmirə bağlanması ilə bağlı göstəriş verib. Arenanın yanındakı boş arenada akademiya və otel tikiləcək. Ot örtüyü təbii olacaq. Tribunalar təmir olunacaq.

Oyun o qədər də ürəkaçan olmasa da, Ağsu səfəri xoş keçdi. Belə qənaətə gəldim ki, bu rayonda futbolla bağlı böyük işlər görmək olar və ilk addımlar da atılır. İndi qalır "Difai Ağsu"nun özünə gəlməsi və azarkeşlərin sevgisini qazanması. Bunun nə vaxt olacağını isə demək çətindi.

İLKİN SULTANLI