Millimizin üzvü Mahir Emreli Xorvatiya çempionatında yaxşı oyun göstərir.

“Dinamo”nun heyətində 11 çempionat oyununa çıxan hücumçu indiyə qədər 4 qol, 3 məhsuldar ötürmənin müəllifi olub. O, komandasında bu göstəricidə yalnız Bruno Petkoviçdən (7 oyun, 5 qol, 2 məhsuldar ötürmə) geridədi. Mahir həmçinin cari avrokubok mövsümündə 8 (2 məhsuldar ötürmə) və ölkə kubokunda 1 (1 qol) oyuna çıxıb. Əlbəttə, normal statistikadı və bizi qürurlandırmaya bilməz. Hər halda, o, bu uğurlara Azərbaycanda imza atsaydı, start heyətindən əskik olmazdı. Amma zaqreblilərin baş məşqçisi Sergey Yakiroviç belə düşünmür. O, geridə qalan 14 tur ərzində Mahirə yalnız 4 dəfə start heyətində şans verib. Maraqlıdı ki, futbolçu Xorvatiya çempionatının cari mövsümündə 533 dəqiqə meydanda olsa da, cəmi 2 dəfə sarı vərəqəylə cəzalandırılıb. Deməli, hücumçunun intizamı da qənaətbəxşdi. Göstərisiciylə də tanış olduq. Üstəlik ötən həftə komandasını məğlubiyyətdən xilas etdiyini yazmışdıq. Həmvətənimiz 94-cü dəqiqədə qol vurmaqla hesabı bərabərləşdirmişdi (1:1). Təbii ki, bütün bunların qarşılığı ehtiyat oyunçular oturacağı ola bilməz. Qətiyyən! Klub azarkeşləri də bizimlə həmrəydi. Göz dəyməsin, onlar Mahiri yerə-göyə sığdırmır, hətta həmvətənimizə yetərincə şans vermədiyi üçün baş məşqçinin ünvanına tənqid də səsləndirirlər. Buna klubun rəsmi səhifəsinin rəy bölməsində rast gəlmək mümkündü. Bəs Yakiroviçin fikrini bulandıran nədi? Mahirin performansı həm rəqəmlərlə, həm də tərəfdarların fikriylə isbat olunursa, baş məşqçiyə nə mane olur?

Bunu sorğulamağımızın başqa səbəbinə də toxunaq. Məşhur statistika portalı “transfermarkt.com”a əsasən bəzi detallara nəzər yetirək. Mahirin ehtiyat oyunçular skamyasında qaldığı və cəmi 30 dəqiqə çıxış etdiyi oyunlarda “Dinamo” məğlubiyyətlə üzləşib. Əksinə, minimum 45 dəqiqə oynadığı matçlar böyükhesablı qələbələrlə yadda qalıb ki, bu da Mahirin qol və məhsuldar ötürmələri sayəsində olub. Əlbəttə, “Dinamo”nun uğurlarını, sadəcə, Mahirlə əlaqələndirmirik. Amma insaf da dinin yarısıdı. Cənab Yakiroviç, Mahir start heyətində yer almaq üçün ağzı ilə quş tutmalıdı ki?!

KƏNAN BAHADIR