“Xırdalan” ardıcıl ikinci qələbəsini qazandı, “Gəncə” isə...
Dünən basketbol üzrə ölkə çempionatında 2-ci turun növbəti oyunu keçirilib.
"Football-plus.az" xəbər verir ki, mövsümün debütantı “Sumqayıt” “Sərhədçi” İdman Mərkəzində “Xırdalan”ı qəbul edib. Görüş “gənclik şəhəri” təmsilçisinin overtaymda məğlubiyyəti ilə başa çatıb – 77:81 (19:13, 12:22, 20:15, 16:17, 10:14). “Xırdalan”ın 29 xal toplayan oyunçusu Yakori Arçi matçın ən yaxşısı sayılıb. 2-ci turun srağagün keçirilən açılış oyununda isə “Gəncə” səfərdə “Xəzri”yə uduzub – 76:93 (18:25, 21:27, 23:27, 14:14).
"Sarı-göylər"in baş məşqçisi Bedri Meriç bu oyunla bağlı fikirlərini "Futbol+"lə bölüşdü:
"Biz mövsümə hazır deyilik. Çempionat oyunlarını da hazırlıq matçı kimi keçiririk. Təəssüf ki, mövsümdən əvvəl təlim-məşq toplanışımız qısa oldu. "Xəzri"yə qarşı görüşdə müdafiədə zəif oynadıq. Düzdü, hücumda həmişə eyni tempdə ola bilməzsən, lakin müdafiədə həmişə uğurlu olmalısan. Mən bunu komandamda görə bilmədim. Gənc oyunçulardan qurulan komandayıq. Ümid edirəm ki, gələcəkdə bəzi şeyləri dəyişəcəyik. İndiki hədəfimiz pley-offa vəsiqə qazanmaqdı".
Təcrübəli mütəxəssis hakimlərdən narazılığını da dilə gətirdi:
"Sabah"la oyunda da gördük ki, bizimkilər qaydanı pozduqları zaman hakimlər bunu qeyd alırlar. Lakin qayda pozuntusu bizə qarşı olanda fərqli qərar verirlər. İstəyir ki, referilər bu balansı qoruya bilsin".
