“Səbail”ə etiraz bildirmək üçün 10 gün möhlət verilib
Bildiyiniz kimi, Tural Bayramlı “Səbail”dən AFFA-nın Oyunçuların Statusu və Transferi Komitəsini şikayət etmişdi.
Yarımmüdafiəçinin fikrinə görə, “dənizçilər” onunla olan müqaviləni hüquqi əsas olmadan təktərəfli qaydada pozub. Lakin qurum bu iddianı əsassız hesab edərək klubun xeyrinə qərar qəbul etdi. Bundan sonra “Araz-Naxçıvan”ın üzvü AFFA Apellyasiya və Arbitraj Tribunalına müraciət etdi. Məsələ ilə bağlı hansısa yenilik yoxdu. Görəsən, proses nə yerdədi? Qurum futbolçunu haqlı sayacaqmı? Bu sualları futbolçunun vəkili Elcan Həsənliyə ünvanladıq. Tanınmış hüquqşünas “Football-plus.az”a açıqlamasında bunları söylədi:
“Apellyasiya və Arbitraj Tribunalı tərəfindən iş icraata qəbul olunub. Cavabdeh “Səbail” klubuna etiraz bildirmək üçün 10 gün möhlət verilib. Onlar lazımi sənədləri təqdim edəndən sonra qurum işə baxacaq. Ehtiyac olarsa, iclas keçiriləcək. Lazım olmasa, təqdim olunan sənədlər əsasında işə baxaraq qərar çıxarılacaq. Biz düşünürük ki, bu məsələdə oyunçu haqlıdı. Çünki üzürsüz səbəbdən klub müqaviləni birtərəfli ləğv edib. Bunun əsasında da futbolçunun hüquqlarını Apellyasiya və Arbitraj Tribunalında müdafiə edirəm. Lakin bu qurumun qərarının necə olacağını təxmin edə bilmərik. Hesab edirik ki, işə düzgün və ədalətli şəkildə baxılacaq. Verəcəkləri qərarı düzgün saymasaq, İdman Arbitraj Məhkəməsinə müraciət edəcəyik. Bunun üçün zamanımız olacaq. Lakin indiki məqamda AFFA Apellyasiya və Arbitraj Tribunalının qərarını gözləyirik”.
İLKİN SULTANLI
Digər xəbərlər
