Elnur Çodarov “Sumqayıt”dan dörd ayın maaşını istəyir
“Sumqayit”da Ayxan Abbasovun köməkçisi olmuş Elnur Çodarov “kimyaçılar”dan AFFA-nın Oyunçuların Statusu və Transferi Komitəsinə təzminatla bağlı şikayət edib.
Adı çəkilən qurum martın 17-də çıxardığı qərarla məşqçinin şikayətini təmin edib. Ancaq bununla barışmayan “gənclik şəhəri” təmsilçisinin rəhbərliyi AFFA-nın Apellyasiya Arbitraj Tribunalına apellyasiya şikayəti ünvanlayıb və qurum “Sumqayıt”ın şikayətini təmin edərək, Oyunçuların Statusu və Transferi Komitəsinin qərarını ləğv edib. Yəni Çodarovun iddiasını əsasız sayıb.
Başverənlərlə bağlı “Futbol+”ə açıqlama verən “kimyaçılar”ın mətbuat katibi Rəşad Məmmədov bunları söylədi:“Elnur müəllim işdən ayrılandan sonra klub tərəfindən təzminat kimi ona ikiaylıq əməkhaqqı təklif olunmuşdu. Ancaq o bununla razılaşmayaraq, mövsümün sonuna qədər alacağı məvacibi tələb edirdi. Bu üzdən də Oyunçuların Statusu və Transferi Komitəsinə müraciət etmişdi. Bu qurum Elnur müəllimin xeyrinə qərar versə də, klub Apellyasiya Arbitraj Tribunalına apellyasiya verməyi lazım bildi. Və sonda klubun haqlı olduğu ortaya çıxdı. Bütün bunlar qanunauyğun formada qərarda göstərilib”.
Durumla bağlı “fuitbolinfo.az” saytına açıqlama verən Elnur bəy isə bu çəkişmədən geri çəkilməyəcəyini, sona qədər haqqını tələb edəcəyini deyib:
"Sumqayıt”ın müqaviləni üzürsüz səbəbdən birtərəfli şəkildə pozması ilə bağlı AFFA-nın Oyunçuların Statusu və Transferi Komitəsinə şikayət etmişdim. Komitə məsələni araşdırandan sonra klubun müqaviləyə birtərəfli şəkildə xitam verməklə müqavilə şərtlərini pozduğunu və 4 aylıq əməkhaqqımı ödəməli olduğunu qərara almışdı. Amma “Sumqayıt” bununla bağlı AFFA-nın Apellyasiya Arbitraj Tribunalına müraciət etdi və tribunal komitənin qərarını ləğv etdi. Hələ ki qərar və onun nəyə əsaslandığı haqda rəsmi bildiriş gəlməyib. Yalnız bundan sonra növbəti addımlar haqda danışmaq olar. Amma hüquqi baxımdan sona qədər haqqımı tələb edəcəm. İndi onu deyə bilərəm ki, AFFA-nın Apellyasiya Arbitraj Tribunalı şikayətə baxarkən Əsasnaməsinin 11-ci bəndini kobud şəkildə pozub. Tribunalın 11-ci maddəsində deyilir ki, apellyasiya şikayətini qəbul etdikdən sonra tribunalın katibi bunu cavabdehə bildirir və cavabdehin öz cavabını verməsi üçün apellyasiya şikayətini aldıqdan sonra 10 gün müddət müəyyən edir. Amma mənə hər hansı bildiriş verilməyib və aprelin 1-də elektron məktub göndərərək 8 aprel tarixinə iclas təyin etdiklərini yazıblar. Bu isə həmin iclasın və orda qəbul olunan qərarın keçərsiz olduğunu göstərir”.
Sonda onu da xatırladaq ki, dekabrın 16-da istefaya göndərilən Ayxan Abasov klubla razılaşmaya əsasən təzminatla təmin olunub.
RƏŞAD
Digər xəbərlər
