Sonuncu Avropa çempionatına aparılmayan, daha dəqiqi, sabiq baş məşqçi Ataman Güneyligilin istəyi ilə qadın voleybol yığmasının heyətindən kənarlaşdırılan Ülkər Kərimova susqunluğu pozaraq ilk dəfə danışmaq istədi. Hazırda “Abşeron”da çıxış edən hücumçu ilə əlaqə saxlayıb ən müxtəlif məsələlər ətrafında söhbətləşdik.
- Mövsümə hazırlıq necə gedir?
- Hazırlığımız yüksək səviyyədədi. Noyabrın 6-da çempionatın ilk turunda "Azərreyl"lə qarşılaşacağıq. Düşünürəm ki, mövsümə qələbə ilə başlasaq, belə də bitirə bilərik. Komandama inanıram.
- Heyətiniz tam komplektləşib?
- İnşallah, bir-iki oyunçu çempionatın ikinci yarısında bizə qoşulacaq.
- Bu mövsüm üçün komandanızın hədəfləri nədi?
- Ötən il yalnız ölkə kubokunu qazanmışdıq. Amma bu il həm çempionluğu, həm də ölkə kubokunu qazanmaq istəyirik.
- Bu yay sənə yerli və ya xarici klublardan təklif var idi?
- Ailəm burda olduğundan xaricdən gələn təklifləri qəbul etmirəm. Yerli klublardan təklif var idi. Lakin mən ötən mövsüm ölkə kubokunu qazanan komanda ilə qalmaq istədim.
- Bəs son çempion və bu mövsüm avrokuboklara yaxşı başlayan "Azərreyl"dən təklif var idi?
- Avrokuboklarda iştirak edən "Azərreyl"ə qarşıdan gələn oyunlarda uğurlar arzulayıram. Ancaq bu komandadan təklif almamışdım.
- Bir az da milli komanda barədə söhbət edək. Ataman Güneyligil yığmanın AÇ-yə yollanan heyətindən səni və Şəfaqət Alışanovanı çıxardı. Buna təəccübləndin? Ümumiyyətlə, baş məşqçi niyə bu addımı atdı? Çünki sən ötən mövsüm "Abşeron"un heyətində həm libero, həm də hücumçu kimi çıxış etmişdin.
- Yığmaya yeni qatılan Ataman bəy 17 oyunçu çağırdı. Bu siyahıda mənim də adımın olmağı sevindirici hal idi. Buna görə məşqçilərə, federasiyaya təşəkkür edirəm. Bildiyiniz kimi, turnirə 14-15 voleybolçu qatıla bilərdi. Siz düzgün vurğuladız ki, mən əvvəl libero mövqeyində oynamışam. Amma ötən il baş məşqçimiz Famil Ağayevin təklifi ilə hücumçu kimi meydana çıxdım. Bəyaz Quluyeva isə libero oldu. Bu plan işə yaradı və biz ölkə kubokunun qalibi olduq. Mən də hücumçu kimi uğurlu çıxış elədim. Ataman Güneyligil də məni yığmaya hücumçu kimi dəvət etdi. Lakin baş məşqçi əvvəl libero oynadığıma görə turnirdə komanda yoldaşlarıma yetərincə kömək göstərə bilməyəcəyim üçün adımı yekun siyahıya salmadı. Bu da mənim üçün sürpriz olmadı. Amma millinin heyətinə dəvət almaq və təlim-məşq toplanışının son gününə qədər komandanın yanında olmaq, kömək etmək mənim üçün şərəf hissi idi.
- Türkiyəli mütəxəssisin heyət seçimini də qınayanlar oldu. Buna münasibətin maraqlıdı.
- Ataman bəy təcrübəli baş məşqçidi. Hər halda, özü texniki heyətlə birgə düzgün qərar verib. Mən məşqçilərin qərarına müdaxilə edə bilmərəm.
- Yığmanın son Avropa çempionatındakı çıxışını necə dəyərləndirirsən? Komandada nə çatmadı?
- Əlbəttə ki, komandanı finalda görmək istəyirdim. Amma bəzi əsas oyunçularımız zədəli olduğu üçün istədikləri oyunu göstərə bilmədilər.
- Turnirdən sonra Ataman Güneyligil uğursuzluğun səbəbini yığma üzvlərində gördü. Hətta bəzi oyunçuları ittiham etdi. Məsələn, 30 yaşdan yuxarı bir sıra oyunçuların hələ indi voleybolu öyrəndiyini dedi. Buna münasibətin necədi?
- “30 yaşdan yuxarı oyunçular hələ indi voleybolu öyrənir” fikri ilə heç razı deyiləm. Bizim qızlar hamısı təcrübəli oyunçulardı. Onlar voleybolu indi öyrənsəydilər, xaricdə çıxış etməzdilər. Baş məşqçinin niyə belə düşündüyün anlaya bilmirəm. Yığmanın turnirə hazırlıq prosesi iki-üç ay keçdi. Bu qısa zamanda da peşəkar oyunçuların tərzini dəyişmək mümkün deyildi.
- Baş məşqçinin qızlar arasında qruplaşma olması fikrinə münasibətin necədi? Ən azı yığma ilə birlikdə təlim-məşq toplanışında olmusan. Bunu daha yaxşı sən bilərsən.
- Mən bunu heç hiss etməmişdim. Deyə bilərəm ki, məncə, bu il gənc, perspektivli, mehriban komanda yığılmışdı. Biz Ataman bəyin yığmaya gəlişini toplanışa qatılmamış bilirdik. Onunla işləmək istəməsəydik, heç bir oyunçu hazırlığa qatılmazdı.
- Səncə, yığmada yerli mütəxəssis işləməlidi, yoxsa əcnəbi?
- Əlbəttə, yerli mütəxəssis çalışsa, bizə də uyğun olar. Amma əsas odu ki, gələn məşqçi nəticə verə bilsin.
CAVİD ƏLİYEV