Bunu qəzetimizin çərşənbə axşamı sayında dərc olunan “Sabah”ın problemləri bitdimi?” sərlöhvəli yazımın davamı kimi qəbul edə bilərsiz.

“Sabah”ın çıxışını, nəticələrini diqqətlə izləyirəm. Ona görə də son yazımda belə sual qoymuşdum, ümid ifadə etmişdim ki, “Sumqayıt” üzərində qələbə ilə “qara zolaq” bitəcək. Dəfələrlə belə olub. Qələbəyə həsrət qalan komandaların baş məşqçiləri “qara zolağa düşdüklərini” deyir, bu böhrandan çıxmaq üçün cəmi bir qələbəyə ehtiyaclarının olduğunu vurğulayırlar. “Sabah” “Sumqayıt” üzərində qazandığı əzmkar qələbə ilə azarkeşlərini sevindirmiş, uğurun davamının gətiriləcəyinə ümidləri cücərtmişdi. Cücərən həmin ümidlər elə “Sumqayıt”la oyunda da məhv oldu. Acı təəssüf hissi ilə qeyd etməliyəm ki, şəxsən mən indiki məqamda “Sabah” üçün tunelin sonunda işıq görmürəm.

Murad Musayev “qara zolaq”da olduqlarını hələ “Qarabağ”la oyundan sonrakı mətbuat konfransında dilə gətirmişdi. Onda “Sabah”ın perspektivləri haqda hələ indiki kimi bədbin düşünmürdük. Fikirləşirdik ki, müvəqqəti çətinlikdi. “Partizan”la oyunda yaxşı oynayıb, turu keçə bilməyən komandanın psixoloji gərginlikdən əziyyət çəkdiyini təxmin edir, avrokubokların eyforiyası bitən kimi hər şeyin qaydaya düşəcəyini fikirləşirdik. Ona görə də “Qarabağ” qarşısında varlıq göstərə bilməyən “Sabah”ı və Murad Musayevi o qədər də qınamadıq. Baxmayaraq ki, buna qədər “Turan Tovuz”la oyunda “faciə” yaşanmışdı, “bayquşlar” Masazırdakı doğma meydanda 0:3 hesabıyla məğlub olmuşdu. “Sabah”ın azsaylı azarkeşləri özlərinə təskinlik verir, “tezliklə düzələcək” deyirdilər.

Sözsüz, belə məqamda “Kəpəz”lə oyun böhrandan çıxmaq üçün əla fürsət idi. Premyer-liqanın autsayderini məğlub edirdin, bununla həm böhrandan çıxırdın, həm də turnir cədvəlindəki rəqiblərini özündən uzağa buraxmamaq üçün 3 xal qazanırdın. Belə vacib məqamda Murad Musayevin könlünə əsas qapıçı Yusif İmanova “yerini göstərmək” düşdü. Həmin yer də ehtiyat oyunçular skamyasında, Musayevin yanında imiş. “Kəpəz”lə qarşılaşmada “çərçivə”nin Rüstəm Samiqullinə tapşırılması çox ciddi səhv idi. Bunu dəfələrlə yazmışam. Bir daha vurğulayıram. Musayev gənc qapıçıya inanıb, onu inkişaf etdirmək, həm də İmanova “əvəzedilməz olmadığını” sübut etmək istəyirdisə, nə üçün sonradan qapıya Rüstəmi qoymadı? Məlum məsələdi ki, çalışdırıcı özü də Rüstəmin elita səviyyəsinə yaxın belə düşməyən qapıçı olduğunu gördü. Amma bunu iş-işdən keçəndən, vacib iki xal itiriləndən sonra görmək lazım deyildi. Məşqlərdə ona diqqət yetirməliydi, qapıçı məşqçiləri acı həqiqəti vaxtında Musayevə deməliydilər.

Elə təsəvvür yaranmasın ki, mən bütün gücümlə Samiqullinin üstünə düşmüşəm, hər fürsətdəcə onu günahlandırıram. Əsla yox. Günah onda deyil. Necə ki, “Sabah”ın problemləri təkcə onunla yekunlaşmır. Komandanın heyətində 13 legioner var. Təəssüf ki, Azərbaycanda futbolçularla bağlanan müqavilələrin maliyyə tərəfləri açıqlanmır. Əcnəbilərə nə qədər pul xərcləndiyini dəqiq hesablaya bilmirik. Amma internet qaynaqlarına baş vurmaqla acı gerçəklikləri görmək, təxmini hesab çıxarmaq mümkündü. Onda görərik ki, faktiki milyonlar havaya sovrulur, əcnəbilərə layiq olduqlarından qat-qat artıq pullar xərclənir. Həmin pulların qarşılığı da turnir cədvəlində əksini tapır. 10 oyuna 10 xal toplayan “Sabah” “Qəbələ” ilə “Kəpəz”i qabaqlayır. Mükafatlar uğrunda mübarizə aparacağını təxmin etdiyimiz, “Qarabağ”a “əlcək atacağını” gözlədiyimiz komanda ikinci dövrənin ilk turundan sonra 8-ci sırada yer alır.

“Sabah”ın ilk 10 turda cəmi iki qələbə qazanması ciddi həyəcan siqnalıdı. Bu rəqəmi üzərinə vurğunu ona görə qoyuram ki, 2-3 tur yox, düz 10 tur oynanılıb. Yəni nəticələr heç cür təsadüfi sayıla bilməz. Təsadüf bir oyunda olar, uzağı iki. Bu qədər təsadüf ola bilməz. Deməli, artıq ciddi müzakirələr aparılmasının, qəti addımlar atılmasının vaxtıdı. Dəyişiklik qaçılmaz görünür. Söhbət həm də təkcə nəticələrdən getmir. “Sabah”ın oyununda dəst-xətt, əzmkarlıq hiss olunmur. 11 futbolçu meydanda xaotik hərəkətlər edir, onların bu xaotik davranışını isə Murad Musayevin ehtiyat oyunçular skamyasındakı intizamsız davranışları “tamamlayır”. Qəflət yuxusundan oyanın. Əks halda heç şübhə etməyə dəyməz ki, mövsümün sonunda mükafatçıların sırasında “Sabah” olmayacaq!

AMAL