"Sabah" hazırda “1 nömrə” kimi oynayır. Komandanın hücum potensialı yüksəkdi, sadəcə, son nöqtəni qoymaqda çətinlik çəkirlər. "Bayquşlar"ın 2-ci çatışmazlığı isə standart vəziyyətlərdən qollar buraxmasıdı. Rəqiblər də "Sabah"la oyunda tempi aşağı salırlar ki, nəticədə Murad Musayevin yetirmələrinin işi çətinə düşür. Düşünürəm ki, komandaya bir qələbə lazımdı. Məhz bu baş versə, Masazır təmsilçisi psixologi gərginliyi geridə qoyacaq. Klubda yeganə problem sırf qələbəsizlikdən doğan gərginlikdi. Bunu da geridə qoyacaqlarına inanıram. Komandanın maliyyə vəziyyəti yaxşı olduğundan oyunçu sarıdan əziyyət çəkmirlər. Heyətlərini də gücləndiriblər. Düzdü, Till ilə Marqarita Kaşuku əvəzləyəsi deyil. Amma zamanla onlar daha yaxşı forma toplayıb, faydalı olacaqlar. Komandaya Belfodil fayda verəcək, o həm milli, həm də top-liqa təcrübəsi olan futbolçudu. Elə "Səbail"lə oyunda da sonradan meydana çıxaraq qol ötürməsiylə yadda qaldı. Qısası, "Sabah"ın uğursuzluğu müvəqqətidi".

"Sabah"ın hazırkı uğursuzluğunun əsas səbəbi "Partizan"la səfər oyunu ərəfəsində "Sumqayıt"la premyer-liqa matçının təxirə salınması oldu ki, bunun da günahkarı baş məşqçi Murat Musayevdi. Adam hər mətbuat konfransında kimləri və nələrisə günahkar çıxarır. Hakimi, rəqib komandanı, meydançanı və s. Adama sual verən lazımdı ki, sən niyə super vəziyyətdə olan komandanı heç bir səbəb olmadan relsdən çıxardın? Zədəlin çox idi? Yox. Fors-major nəsə baş vermişdi? Yox. Qrafik sıx idi? Yox. Mövsüm yeni başlamışdı və ilk turda da "Qəbələ" üzərində parlaq qələbə var idi. Elə vəziyyətdə olan komandaya dayanmaq yox, oynamaq lazım idi. Təəssüf ki, heç bir səbəb olmadan "Sumqayıt"ıa oyun təxirə salındı, relsdə olan komanda relsdən çıxarıldı, indi heç cür həmin relsə qayıda bilmir. Ard-arda gələn uğursuzluqlar futbolçular üzərində əlavə psixoloji basqı yaradıb. İndiki halda komandanın toparlanıb bir qələbə qazanması vəziyyətdən çıxış yolu ola bilər. Bunun üçün isə futbolçuları düşdükləri psixoloji gərginlikdən çıxarmaq lazımdı. Amma Musayev hələ ki bunu da bacarmır".