“Sabah”a böyük ümidlərim var idi. Komandanın rusiyalı baş məşqçisi Murad Musayevin bacarıqlı mütəxəssis olduğuna özümü inandırmışdım. Onun çalışdırdığı komandanın ötən mövsüm göstərdiyi oyun, qazandığı nəticələr məndə bu inamı yaratmışdı. Musayevin əlinin altındakı heyət də Azərbaycan üçün ən yaxşılardandı. Əsas komanda ilə yanaşı, ümumilikdə rəhbərliyin futbola yanaşması da diqqəti çəkir. Çünki “Sabah” klub olaraq, uşaq futbolunun inkişafı istiqamətində də böyük işlər görür.

Xəbəri olanlar təsdiqləyər ki, hazırda “Sabah”ın uşaq akademiyası əla şəraitə malikdi. Klub rəhbərliyi həm akademiyada çalışan mütəxəssisləri, həm də orda məşq edən uşaqları qayğıyla əhatə edib, yüksək səviyyəli şərait yaradıb. Qalır futbol oynamaq, məşq etmək, həm nəticə qazanmaq, həm də Azərbaycan futbolunun gələcəyi üçün yeni istedadlar yetişdirmək.

Təəssüf ki, Murad Musayevin çalışdırdığı əsas komandanın nəticələri heç də bu gözləntilərə və görülən böyükmiqyaslı işlərə uyğun deyil. “Sabah” yeni mövsümdə ilk qələbəsini elə 1-ci turda qazandı. Masazırdakı stadionda “Qəbələ”nin qapısına beş cavabsız top vuruldu. Kim inanardı ki, davamı gəlməyəcək, bu qələbə “Sabah” üçün ilk dövrədə yeganə olacaq?! Bunu iddia edənə gülərdik, yumşaq ifadələrlə onun futboldan baş çıxarmadığını, bizim futboldan bixəbər olduğunu deyərdik. Amma el dili ilə desək, ağlımıza gəlməyən başımıza gəldi. “Sabah” “Qəbələ” ilə oyundan sonra düz iki ay yarım qələbəyə həsrət qaldı. Avqustun 6-da “Qəbələ”ni məğlub edən “bayquşlar” bir də oktyabrın 21-də “Sumqayıt”ı 3:1 hesabıyla üstələdi. Bəlkə də taleyin ironiyasıdı. 2-ci turda “Sabah” “Sumqayıt”la qarşılaşmalıydı. Klubun başbilənləri həmin görüşün təxirə salınmasını istədi, PFL də bu istəyi yerinə yetirdi. Di gəl ki, “Neftçi” ilə “Qarabağ” həmin tur oynadı. Bəlkə də bu ayrı-seçkiliyin “mükafatı” bu oldu. Yaxud da həmin təxirəsalma komandanı kökdən saldı, futbolçular hər şeyin qaydasında olduğu bir vaxtda oynamayıb formadan düşdülər.

Bütün bu ehtimalların üzərində çox dayanmayacam. İndi məni düşündürən sual başqadı. Əminəm ki, bu sual “Sabah”a könül verən azarkeşləri, eləcə də bu klubun uğurunu istəyən hər kəsi narahat edir. “Sumqayıt” üzərində qazanılan qələbə “Sabah”ı “qara zolaq”dan çıxardımı? Uğursuz seriya bitdimi? İnanmaq çətindi. “Qarabağ”, “Zirə”, “Neftçi” kimi rəqiblərlə oyunları bir kənara qoyuram. Murad Musayevin komandası doğma meydanda “Turan Tovuz”a 0:3 hesabıyla məğlub oldu. Özü də rəqib qapısı qarşısında bircə təhlükəli vəziyyət belə yaratmadan. Hamımız üçün əsl sensasiya idi. “Qarabağ”a uduzduqları oyundan sonra Murad Musayev söz verdi ki, “Kəpəz”lə oyunda hər şeyin fərqli olmasına çalışacaqlar. Çalışdılarmı? Məşqlərdə necə çalışdıqlarını deyə bilmərəm. Belə vacib oyunda “çərçivə”nin təcrübəsiz və çəlimsiz Rüstəm Samiqullinə tapşırılması qələbə üçün bütün vasitələrə əl atan baş məşqçiyə yaraşmadı. Maraqlıdı ki, “Sabah” “Neftçi” və “Qəbələ” ilə qarşılaşmalar istisna olmaqla bütün digər oyunlarda məğlub duruma düşüb. “Kəpəz”, “Səbail” və “Araz Naxçıvan”la görüşlərdə qapısında ilk qolu görən komanda məğlubiyyətdən qaçmağı bacarıb və meydandan 1 xalla ayrılıb. “Sabah”ın iddialarını, heyətini göz önünə gətirəndə heç-heçənin uğur sayılmadığını əminliklə demək olar.

“Sumqayıt”la qarşılaşmanın ssenarisi də eyni idi. Görüşdəki ilk qol “Sabah”ın qapısında vuruldu. Erkən qol vuran qonaqlar 54-cü dəqiqəyə qədər hesabda öndə oldular. Məhz bu dəqiqədə hesab bərabərləşdi. “Sabah”a qələbə gətirən qollar isə 80-ci dəqiqədən sonra vuruldu. Qarşılaşmanı izləyənlər də təsdiqləyər ki, qələbəyə qazanılsa da, “Sabah”ın oyununda problemlər açıq-aşkar hiss olunurdu. Qapı xəttində olan problemləri Murad Musayev mətbuat konfransında özü etiraf edib. Gələcəyinə böyük ümidlər bəslədiyimiz Yusif İmanovun “canlı sədd”i necə pis qurduğunu “Partizan”la Belqraddakı oyunda da görmüşdük. Həm onun, həm də komanda yoldaşı Rüstəmin buraxdığı qollar bizi təəccübləndirir. Sanki “Sabah”ın qapıçılarına yaxın küncü necə qorumaq, cərimə zərbəsi zamanı komanda yoldaşlarını topun qarşısına necə düzmək lazım olduğunu öyrətməyiblər.

Di gəl ki, problem yalnız qapıçılarla bağlı deyil. Aleksey İsayev “Sumqayıt”la oyunda azı iki epizodda əlverişli mövqedə olsa da, “çərçivə”ni nişan ala bilmədi, topu göyə uçurdu. “Sabah”ın xeyli legioneri var, hamısı da adlı-sanlı. Amma baxırsan ki, çətin məqamda oyunu üzərinə götürən, komandanı arxasınca aparan tapılmır. Mövsümün artıq 2-ci dövrəsi başlayıb, “Sabah”da isə komanda oyunu hələ də yoxdu. Ümid edirəm ki, “Sumqayıt”la oyun “qara zolağın sonu” idi. Murad bəy problemləri həll edəcək, futbolçular toparlanacaq. Yalnız onda deyə biləcəyik ki, “Sabah”da problemlər bitdi!

AMAL