Futbol üzrə ölkə çempionatının 1-ci liqasında 6-cı turun "İrəvan" - "Şamaxı" oyununu izləyənlər arasında bölgə təmsilçisinin İdarə Heyətinin sədri Elçin Usub da var idi.

Onunla klubun yeni mövsümdəki çıxışı, qarşıya qoyulan hədəflər haqda söhbət etdik.

- Elçin bəy, "Şamaxı"nın yeni mövsümdə çıxışını necə qiymətləndirirsiz?
- Ötən mövsüm və indi qarşımıza qoyulan hədəflər başqadı. Ötən il daha çox heyətimizdəki gənc, təcrübəsiz futbolçuları inkişaf etdirməkdə maraqlıydıq. Ona görə də məşqçilərimizə daha çox rahatlıq, sərbəstlik vermişdik. Bu mövsüm isə hədəfimiz başqadı. Qayəmiz premyer-liqaya qayıtmaqdı. Ümumi götürəndə komandamızın çıxışını qənaətbəxş sayıram. Təbii ki, bundan daha yaxşı ola bilərdi.

- "Şamaxı" 1-ci liqada iddialı komandalardandı. Buna rəğmən, 5-ci turda gözlənilmədən evdə "Mingəçevir"ə 2:3 hesabıyla uduzduz. Səbəb nə idi?
- Yəgin ki, oyuna baxmısız. Bütün komponentlərdə üstün tərəf biz idik. Yekəxanalıq kimi çıxmasın, matçın böyük hissəsini rəqibin qapısı ağzında keçirdik. Sadəcə, fərdi səhvlər etdik ki, rəqib də bundan maksimum yararlanaraq 3 qol vurub qələbə qazandı. Əminəm ki, Vüqar müəllim başda olmaqla məşqçilər korpusu bu məğlubiyyəti ciddi təhlil edərək futbolçulara daha yaxşı çıxış etməli olduqlarını aşılayıb.

- Əlavə transferlər haqqında düşünürsüzmü?
- Bu barədə baş məşqçimiz danışsa, daha yaxşı olar. Amma hesab edirəm ki, güclənməyə ehtiyacın olub-olmadığını aydınlaşdırmaq üçün əlavə 2-3 turun da keçməsi lazımdı. Çox güman, qışda heyətimizi gücləndirə bilərik. Amma istisna hal kimi o vaxta qədər yeni oyunçunun qoşulması istisna deyil.

- Bəs sponsor axtarışı necə gedir?
- İnanın ki, bu yöndə daim axtarışdayıq. Bir gün, bir an belə dayanmaq bilmirik. Əslində "Şamaxı" olaraq, yenidən qurulub region komandasına çevriləndə qarşıya qoyduğumuz əsas məqsəd Azərbaycan futboluna oyunçular yetişdirmək idi. Ona görə də bu yöndə sponsordan çox, tərəfdarımızın olmasında maraqlıyıq. Ölkə futbolunun gələcəyinə ümidli olan, bu yolda bizimlə addımlamaq istəyən imkanlı şəxslərin bizə dəstək olacağına inanırıq və ümidimizi itirmirik.

- Deyirsiz ki, premyer-liqaya qayıtmağı hədəfləyirsiz. Deyək ki, istəyinizə nail olduz, amma sponsor, tərəfdaş tapa bilmədiz və dövlətin yardımı sayəsində elitada mübarizə aparmalı olduz. Hazırda çempionatda məhz bu qaydada çıxış edən "Kəpəz"in vəziyyəti göz önündədi. Siz də Gəncə təmsilçisinin vəziyyətini yaşamaq istəyirsiz?
- "Kəpəz"in vəziyyəti ağırdı. Buna rəğmən, mübarizə aparır, döyüşürlər. Onlara uğur arzulayıram. Yuxarıda qeyd etdiyim kimi, bu yolda axtarışı davam etdiririk. Ümidimizi itirmirik. Elə sizin vasitənizlə də Azərbaycan futbolunun və yerli oyunçuların inkişafında maraqlı olan, vətənpərvər, imkanlı şəxsləri, iş adamlarını bizə dəstək olmağa çağırıram.

ABDULLA İSMAYILOĞLU