Mövsümlərarası fasilədə daha iki futbolçu "Qəbələ”dən ayrılıb. Klub saytının yaydığı xəbərə görə, Rövlan Muradov və Felipe Santos başa çatan müqavilələrini yenilənməyiblər.

Braziliyalı futbolçunun artıq yeni klubu da bəllidi. Santos qarşıdakı bir ili İsraildə, daha dəqiqi, Hayfa “Apoel”ində keçirəcək. 26 yaşlı vinger artıq rəsmi müqaviləyə imza atıb.

“Qəbələ” futbol akademiyasının yetirməsi olan və əsas komandada keçirdiyi 117 oyunda 12 qola imza atan Rövlanın isə karyerasını harda davam etdirəcəyi hələ dəqiqləşməyib. Etibarlı mənbədən “football-plus.az”a daxil olan məlumata görə, Muradov “qırmızı-qaralar”ı “Sumqayıt”a dəyişəcək.

“Kimyaçılar”ın baş məşqçisi Samir Abasov onun xidmətində maraqlıdı.

Xatırladaq ki, "Qəbələ bundan əvvəl Məqsəd İsayev, Ramon Maçado, Səlahət Ağayev və Andrey Strijak ilə yolları ayırıb.

RƏŞAD