İngiltərə futbol ictimaiyyətinə ağır itki üz verib.

"Football-plus.az" xəbər verir ki, “Mançester Yunayted”in əfsanəvi futbolçusu ser Robert (Bobbi) Çarlton oktyabrın 21-də 86 yaşında vəfat edib.

2020-ci ildə ona demans diaqnozu qoyulmuşdu. Demans beynin zədələnməsi ilə bağlı olan, psixi funksiyaların pozulmasına, yaddaş itkisinə, əvvəllər əldə edilmiş biliklərin və praktiki bacarıqların itirilməsinə səbəb olan xəstəlikdi. “Mançester Yunayted”in yetirməsi olan Çarlton peşəkar futbolçu karyerasına bu klubda başlayıb. “Qırmızı şeytanlar”ın formasını 1956-73-cü illərdə geyib. Sonra “Preston Nort End” (1974-75), “Uoterford” (1976), “Nyukasl KB Yunayted” (1978), “Pert Azzurri” (1980) və “Blektaun Siti” (1980) klublarında çıxış edib. Hücumameyilli yarımmüdafiəçi və hücumçu kimi çıxış edən ser Bobbi İngiltərə tarixinin ən yaxşı futbolçularından biri hesab olunur. O, 1958-70-ci illərdə formasında 106 oyunda meydana çıxıb 49 qol vurduğu milli komanda ilə 1966-cı ildə dünya çempionu, “Mançester Yunayted”lə 1968-ci ildə Çempionlar Kubokunun qalibi olub. Əfsanəvi futbolçu 1966-cı ildə “Qızıl top”a layiq görülüb. Çarltonun 1958-ci ildə MY-nin futbolçuları və məşqçi heyətinin ölümü ilə nəticələnən Münhendəki təyyarə qəzasından sağ çıxanlardan biri olduğunu da xatırladaq.

İngiltərə yığması ser Bobbinin xatirəsini noyabrın 17-də yad edəcək. Həmin gün Qaret Sautqeytin komandası AÇ-2024-ün “Uembli”də keçiriləcək seçmə oyununda Maltanı qəbul edəcək.