Start oyununu “Cəlilabad” qazandı
Sərhədçi – Cəlilabad 76:86 (10:26, 31:43, 60:55, 76:86)
Srağagün basketbol üzrə ölkə çempionatında 2023/24 mövsümünə start verildi.
Əvvəlki saylarda da məlumat verdiyimiz kimi, ötən ildən fərqli çempionatda 8 yox, 10 komanda mübarizə aparır. Komandalar da heyətini səviyyəli basketbolçularla gücləndirə bilib. "Sərhədçi" İdman Kompleksində keçirilən açılış oyununda əvvəl azarkeşlər üçün qısa konsert təşkil olundu. Daha sonra meydana "Sərhədçi" və "Cəlilabad" komandaları çıxdı. Həqiqətən də gərgin oyuna şahidlik etdik. Qonaqlar oyuna sürətli hücumlarla başladılar. Birinci çeyrək cəlilabadlıların üstünlüyü ilə keçdi. Bölgə təmsilçinin heyətində Zaur Paşayevlə 19 xal qazanan Tomas Kobinin performansı alqışalayiq idi. Lakin 2-ci, 3-cü çeyrəkdə Vladimir Boşnyakın yetirmələri geridönüş etməyi bacardılar. Hətta meydan sahibləri tablodakı rəqəmləri öz xeyrinə də dəyişə bildi. Bəlkə də bu, qonaqların arxayınlaşmasına görə oldu. Ancaq Şəhriyar Əsgərovun komandasının sona kimi əzmkar mübarizə aparması qələbəni gətirdi. Beləliklə mövsümün açılış matçında "Cəlilabad" sevindi.
Oyunu izləyənlər arasında Dövlət Sərhəd Xidmətinin rəhbəri Elçin Quliyev, Azərbaycan Basketbol Federasiyasının prezidenti Emin Əmirullayev, tanınmış aktrisa Ülfər Bəşir, bu mövsüm ölkə çempiontında çıxış edəcək komandaların baş məşqçiləri, basketbolçuları da var idi.
“Cəlilabad”ın baş məşqçisi Şəhriyar Əsgərov oyundan sonra bəzi suallarımızı cavabladı.
"Oyun bizim üçün pis keçmədi. Sadəcə, əvvəldəki üstünlük bizi arxayınlaşdırdı. Hesabda böyük fərqlə irəlidə olmağımız ədalətli nəticə deyildi. Çünki mövsümün ilk matçı olduğu üçün “Sərhədçi”nin də oyunu alınmadı. Üçüncü çeyrəkdə, demək olar ki, matçın taleyi həll olundu. Rəqib bütün gücünü bu hissədə xərclədi. Son hissədə isə əsas oyunçularımızı meydana saldıq və sonda da qələbə qazandıq".
- Hansı nöqtədə problem yaşadız?
- Zona müdafisində rəqibə uduzduq. Çünki onlar boyalı hissələrdə bizə “üçlük” atmağa imkan tapdılar. Lakin ona qarşı tez plan fikriləşdik və şükür ki, bu da baş tutdu.
- Hədəfləriniz nədi?
- Real danışaq, çempionluq barədə söhbət etmək tezdi. Çünki mən 15 yaşlı uşaq deyiləm ki, emosiyalara qapılaraq bunları deyim. İlk məqsəd “altılıq”a düşüb pley-offa vəsiqə qazanmaqdı. Ancaq böyük uğur qazansaq, gözəl olar.
Cəlilabadlıların təcrübəli kapitanı Zaur Paşayev də oyunla bağlı danışdı:
- Əvvəlcə oyunla bağlı təəssüratını dinləyək.
- Komandamı təbrik edirəm. Rəqib də pis oynamadı. İnşallah, belə qələbələrin davamı gələr. Məqsədimiz ilk “altılıq”a düşməkdi.
- Böyük fərqlə önə keçdikdən sonra ikinci çeyrəkdə rəqib bu üstünlüyü aradan qaldıra bildi. Səncə, bu arxayınlıqla bağlıdı?
- Bəli, bir az arxayınlıq yarandı. Lakin 3-cü çeyrəyin sonunda komanda özünə gələ bildi.
- Bir çoxları bölgə təmsilçilərinin bu mövsüm güclü olmayacağını və paytaxt klublarına rəqabətdə uduzacağını düşünür. Sən bu barədə nə düşünürsən?
- Bəzi klubların büdcəsi yaxşı olduğu üçün istədikləri legionerləri gətirirlər. Lakin bizim komanda da yaxşı heyətə malikdi. Sona kimi mübarizə aparacağıq.
- Yaş və boy baxımından rəqibdən geri qalsan da, ancaq oyundakı performasın alqışalayiq oldu.
- Artıq yaşım da ötüb keçib. Siz məni 15 il əvvəl görərdiz (gülür). Zarafat edirəm. İndi heyətimizdə və digər klublarda yaxşı, prespektivli oyunçular var. İnşallah, onlar məndən də yaxşı olacaqlar.
19 xal qazanmaqla komandasının qələbəsində böyük pay sahibi olan Tomas Kobi də matça bağlı fikirlərini bildirdi:
“Bu komanda yeni qurulub. “Cəlilabad”da olduğuma görə xoşbəxtəm. Öz oyunuma gəlincə, dürüst danışsaq, yaxşı oynadım. Komandamın hədəfləri üçün mübarizə aparacam”.
