Oktyabrın 22-də Dənizkənarı Bulvarda dünyanın ən həyəcanlı drift yarışlarından olan “Red Bull Car Park Drift”in Azərbaycan üzrə milli finalı keçiriləcək.
"Football-plus.az" xəbər verir ki, seçiləcək qalib, yəni ən yaxşı drifter 25 ölkənin qatılacağı “Red Bull Car Park Drift”in Dünya Finalında ölkəmizi təmsil etmək üçün Qətərə yollanacaq.
Azərbaycan Avtomobil Federasiyasının təşkilatı dəstəyi ilə keçirilən və özünəməxsus sərt qaydalarla zəngin olan “Red Bull Car Park Drift” yarışında ən bacarıqlı 16 iştirakçı milli final mərhələsinə yüksəlib. Burda isə beynəlxalq münsiflər heyəti maneələri ustalıqla keçən və ən yaxşı drift göstərən iştirakçını maksimum balla qiymətləndirməklə qalib elan edəcək.
2012-ci ildə Əbu-Dabidə ən uzun drift edərək adını Ginnesin Rekordlar Kitabına yazdıran dünyaşöhrətli Abdo Feqali də yarışda iştirak edənlərə dəstək olmaq üçün Bakıya gələcək. O həmçinin 2008-ci ildə Livanda keçirilən ilk “Red Bull Car Park Drift” yarışının da qalibidi.
“Red Bull Car Park Drift” “Castrol” avtomobil yağlarının, “Mazda Azərbaycan”ın və Dənizkənarı Bulvar İdarəsinin dəstəyi ilə keçirilir. Tədbirin xüsusi qonağı HİSS yeni mahnısı ilə drift trekində çıxış edəcək. Bu il tamaşaçıların yarışı daha rahat izləməsi üçün tribunalara bilet satışı da həyata keçirilir. Biletləri iticket.az saytından və ya şəhərin kassalarında əldə etmək mümkündü. Tamaşaşıların vaxtını əyləncəli keçirməsi üçün tədbirin ərazisində müxtəlif aktivliklər nəzərdə tutulub. Bir sözlə, oktyabrın 22-si, saat 14.00-da Dövlət Bayrağı Meydanının parkinq ərazisində maraqlı tədbir olacaq.