Pol Poqba başına böyük iş açıb. Dünya çempionu orqanizmində qadağan edilmiş maddə tapıldığı üçün, necə deyərlər, Əli aşından da olacaq, Vəli aşından da!.

Fransalı yarımmüdafiəçi dopinq testi müsbət çıxdığına görə “Yuventus”da ayda 873 min avro yox, 2 min avro qazana biləcək. Goal.com-un məlumatına görə, 30 yaşlı futbolçu daha bir dopinq testindən keçə bilməyib və Turin klubunun maaşla bağlı qərarı qeyri-müəyyən müddətə qədər qüvvədə qalacaq. Pol həmçinin idman məhkəməsində dopinq qəbulunda təqsirli bilinərsə, uzunmüddətli cəza almaq və müqaviləsinə mümkün xitam verilmə təhlükəsi ilə üzləşəcək. “Yuventus” rəhbərliyi hələ ki, ona münasibətdə belə radikal addım atmayıb, ancaq fransalı oyunçuya maaşının azaldılması ilə bağlı məlumat verib. Qaydalara əsasən, cəzalı futbolçulardan söhbət gedəndə “Yuventus” Poqbaya yalnız İtaliya Futbolçular Assosiasiyası ilə kollektiv müqavilədə nəzərdə tutulan minimum əməkhaqqını ödəməlidi. Bu isə o deməkdi ki, səbəbkar ayda yalnız 2 min avro ala biləcək.

Poqba klubla müddəti 2026-cı ilin yayına qədər nəzərdə tutulan müqaviləsinə görə, ildə təxminən 10,48 milyon avro məvacib alırdı. Lakin məlum səbəbdən indi bu məbləğin yalnız cüzi bir hissəsinə iddia edə bilər.