"Daha bir mərhələnin sonuna gəldik. Qələbəmizi kiçiltmək istəmirəm, amma yunanlar üzərində böyük üstünllüyə malik idik. Polşanı Bakıda məğlub etsək də, son oyunda böyük hesabla uduzduq. Fikrimcə, bu yenilgi bizim üçün siqnal olmalıdı. Səhvlərdən nəticə çıxarmaqla qarşıdakı turnirlərdə daha yaxşı çıxış etməliyik. İyulda püşk atılacaq və elit mərhələdəki rəqiblərimiz bilinəcək. Çoxları düşünür ki, qrup lideri kimi vəsiqəni təmin etsəydik, daha münasib rəqiblər düşərdi. Mən bu fikirlə razı deyiləm. Biz yalnız dünya çempionatına vəsiqəni təmin etməyi yox, həmin turnirdə mükafatçılar sırasında yer almağı hədəfləyirik. Bunu düşünməsək, deməli, ancaq ad olsun deyə dünya çempionatında iştirak üçün çırpınırıq. Əlbəttə, qrup lideri olmaq da yaxşı hal olardı. Amma alınmadı. Əsas odu, qarşıya qoyulan hədəfə çatmışıq. Uduzduğumuza görə bəzi fikirlər irəli sürülür. Amma məsələni obyektiv təhlil edək. Oyun planında kreativliyi də nəzərə almaq lazımdı. Demirəm, yaxşı oynayaq, amma nəticəni fikirləşməyək. Əlbəttə, nəticə də önəmlidi. Lakin yaxşı nəticələri gözəl oyunla qazanmaq daha yaxşıdı".

"Yalnız Yunanıstanla matçda sonradan meydana çıxaraq 20 dəqiqə oynadım. 9 illik milli karyeramda, ondan öncə isə klublarda heç vaxt meydana sonradan çıxmamışam. Həmişə start heyətində çıxış etmişəm. Bunu baş məşqçiylə söhbətim zamanı da dedim. Təbii ki, kimlərə daha çox şans vermək məşqçinin qərarııdı. Buna da hörmət edirəm. Mənim üçün əsas həm öz, həm də yığmamız adına əlimdən gələnin ən yaxşısını etməkdi. Bundan sonra da bu düşüncədə olacam".