Ölkəmizdə futbolla maraqlananların böyük əksəriyyəti Naci Şensoyu tanıyır.

O, “Turan”dakı işi və xüsusən də çarpıçı açıqlamaları ilə şöhrət tapmışdı. Həm də Tovuzda maraqlı komanda formalaşdırmışdı. Amma sonradan türk mütəxəssislə yollar ayrıldı. Qəribədi ki, Naci bəyin adı daha sonra klublarımızla yanaşı çəkilmədi. Heç milliyə də namizəd göstərilmədi. İndi onun “Turan Tovuz”u yenidən premyer-liqada mübarizə aparır, hansısa hədəflərə çatmaq istəyir. Görəsən, Naci bəyi Tovuzdan axtaran olurmu? Ümumiyyətlə, ekstravaqant çalışdırıcı hazırda nə işlə məşğuldu?

- Salam, Naci bəy, necəsiz, haralardasız?
- Hər şey yaxşıdı, Bolqarıstandayam.
- Orda nə işlə məşğulsuz?
- 10 öncə çalışdırdığım Sandansk şəhərinin “Vihren” komandasına dönmüşəm. İşlər qaydasındadı. Hazırda aşağı liqada çıxış edirik. Klub prezidenti xahiş etdi ki, komandanı yenidən dirçəldərək layiq olduğu yerə gətirək. Yəni hədəfimiz Bolqarıstan premyer-liqasına vəsiqə qazanmaqdı.
- Naci bəy, bizim liqanın oyunlarını izləyirsiz?
- Təəssüflər olsun ki, yox! İzləyə bilmirəm. Amma nəticələrdən xəbərim var. Bəzən də “Qarabağ”ın avrokubok qarşılaşmalarını televiziyadan izləyirəm.
- Bilirsiz də, “Turan Tovuz” premyer-liqada mübarizə aparır. Sponsorları da var. Rəhbərlik bildirməsə də, avrokuboklara vəsiqə qazanmaq üçün oynayırlar. Bu komanda ilə bağlı nəsə bilirsiz?
- Əlbəttə! “Turan”la, yəni mənim Leylamla həmişə maraqlanıram. Premyer-liqada oynadıqları üçün çox şadam. Onsuz da “Turan”nın yeri buradı. Premyer-liqada çıxış etmək və çempionluq uğrunda mübarizə aparmaq Tovuza yaraşır. Amma indiki güclərinə bələd deyiləm. Sadəcə, mənim yetirmələrim olan, Azərbaycan millisində çıxış etmiş Ayxan Abbasovun baş məşqçi, Nadir Nəbiyevin idman direktoru olduğunu bilirəm. Bu, mənim üçün böyük qürurdu. Onlar birgə yaxşı işlər görürlər. Hər ikisini də təbrik edirəm.
- “Turan Tovuz” rəhbərliyindən sizlə əlaqə quran olub? Heç olmasa hal-əhval tuturlar?
- Əlbəttə! Tovuzlular mənimlə həmişə maraqlanırlar. Çünki çoxlu gözəl günlərimiz oldu. Yadımdadı, indi güclülərdən sayılan “Neftçi”ni, “Qarabağ”ı çox asanlıqla məğlub edirdik. 10 min azarkeş önündə oynayırdıq. Həmin gözəl günlərim xətrinə məni təkcə tovuzlular yox, Azərbaycanın digər bölgələrindən olanlar da axtarırlar, halımı soruşurlar. Klubdan isə arada danışdığımız dostlarım var.
- O vaxt “Turan” dağılanda rəhbərlik sizə borclu qalmışdı. Həmin pul ödənildi?
- Bəli, ödənildi. Mənə borcları yox idi. Vəkilimə borcluydular. Mənə olan borclarının çox az miqdarını öz hüquqşünasıma bağışlamışdım. Həmin mövzu da sonradan həll olundu.
- Sirr deyilsə, məbləğ nə qədər idi?
- 30 min dollar civarında.
- Naci bəy, Azərbaycan yaxşı illər keçirdiz, normal komanda formalaşdırmışdız. Ən əsası nəticə verdiz. Nə üçün sonradan bizim klublar sizə maraq göstərmədilər?
- Yaxşı sualdı. Amma bunu məndən yox, klublarınızın rəhbərlərindən soruşun! Sadəcə, bunu demək istəyirəm. Mən Türkiyə, Bolqarıstan, Şimali Makedoniya, Suədiyyə Ərəbistanı, Serbiya klublarında işləmişəm. Deməli, bacarıqlı məşqçiyəm. Azərbaycanda işləməməyimin səbəbkarı mən yox, klublarınızın rəhbərləridi. Çünki məni heç kim öz komandasına dəvət etmədi.
- Bizim milli komanda ilə də adınız hallanmayıb. O qədər türkiyəli məşqçini namizəd göstəriblər, amma sizi yox. Niyə?
- Bu sual da mənə aid deyil. Çünki qərarı AFFA verir. Rəhmətlik Ramiz Mirzəyev yığmada işləməyimi istəyirdi. Səmimi deyirəm. Bunun üçün çox çalışdı. Lakin ömrü yetmədi. Bunu dostumuz Tahir Süleymanov çox yaxşı bilir. Ondan soruşa bilərsiz. Ramiz Mirzəyev mənim haqda fikirlərini Tahir Süleymanova demişdi. Gəlin etiraf edək ki, mənim dövrümdə “Turan” çox əla futbol oynayırdı. Tərzimiz hamı tərəfindən bəyənilirdi. Hamı “Turan”ın “Azərbaycanın “Barselona”sı” olduğunu deyirdi. Həmin dövrdə millinizi rəhmətlik Karlos Alberto Torres çalışdırırdı. Heç cür uğur əldə edə bilmədi. Bu səbəbdən də Ramiz Mirzəyev məni baş məşqçi etmək niyyətində idi. Lakin ömrü yetmədi.
- İndiki AFFA rəhbərliyi ilə aranız yoxdu?
- Yox! Hansısa problem yoxdu. Mənim milli komandaya dəvət olunmamağım onların seçimidi. Çünki qərarı onlar verirlər. Demək ki, belə istəyirlər. Amma əminliklə deyirəm ki, indiki AFFA rəhbərliyi məni milli komandanın baş məşqçisi təyin etsəydi, futbol ictimaiyyəti buna sevinərdi. Çoxları şad olardı, məni dəstəkliyərdilər.
- Bizim futbolumuzun indiki zamanı yaxşıdı, yoxsa siz işlədiyiniz dövrlər?
- Məncə, o dövrlər. Düşünürəm ki, indi daha çox pul xərclənir. Amma “Qarabağ”dan başqa hansısa klubun uğuru yoxdu. İndiki pullar həmin dönəmdə olsaydı, biz daha çox uğur əldə edərdik.
- Futbolumuzun daha da inkişaf etməsi üçün nə etməliyik?
- Çox gözəl sualdı. Daha yaxşı olmağınız üçün mütləq şəkildə uşaq futbolunu inkişaf etdirməlisiz. Orda nəsə etməsəz, gələcəkdə uğur gözləməyin. Stadionlar və uşaq futbol məktəbləri mütləq şəkildə Avropa standartlarına uyğunlaşdırılmalıdı. Məşqçilər daha çox idealist olmalı və işlərini sevgi ilə yerinə yetirməlidirlər. Gənc mütəxəssislər ölkə xaricində kurslara getməlidi. Əsasən Niderland və Fransanın aşağı yaş komandalarının necə təşkilatlandığını öyrənməlidilər. Çalışın ki, ləyaqətli məşqçilər klublarınızda işləsin. Onlara yaxşı maaş verin ki, öz işlərindən yapışa bilsinlər. Amma mən keçmişdə aşağı yaş qrupu üzrə komandaların məşqlərindən narazı qaldım. Müəllimlər telefonla qurdalanırdılar. “Niyə belə edirsiz” soruşanda “hocam, nə qədər maaş alırıq ki”, – deyə cavab verirdilər. Belə problemlər həll olunan zaman Azərbaycan futbolçu çox gözəl inkişaf edəcək və yaxşı yerlərə gələcək.

İLKİN SULTANLI