“Sabah” – Nicat Mehbalıyev münaqişəsi davam edir
“Sabah”ın qapıçısı Nicat Mehbalıyev ətrafında qəribə durum yaranıb. Yusif İmanovla layiqli əvəzedici ola biləcək birisi əsas yox, əvəzedici komanda ilə məşq edir.
“Sabah”ın baş məşqçisi Murad Musayev “Kəpəz”lə oyundan sonra ona bu haqda ünvanlanan sualın cavabında “bu suala rəhbərlik cavab verməlidi” demişdi. Musayevin tövsiyəsinə əməl edərək klubun Müşahidə Şurasının üzvü və idman direktoru İqor Ponomaryova üz tutduq:
"Futbolçunun bizimlə müqaviləsi var. Amma o getməkdə israrlıdı. Biz də onun xidmətində maraqlı olduğumuzu deyirik. Həmçinin vurğulamışıq ki, komandada sağlam rəqabət olmalıdı və kimin oynayıb-oynamayacağına baş məşqçi qərar verir. Belə olduqda qapıçı özünü bizim ailənin üzvü kimi hesab etmədiyini vurğulayır. Ona görə Nicatı əsas komandadan uzaqlaşdıraraq əvəzedicilərə göndərmişik. Atdığımız bu addım da dünya futbolu praktikasında mövcuddu. Yaxşı ki, əvəzedicilər var, hansı ki, əsas komandada zəif təsir bağışlayan və ya oynamaq istəməyənləri ora göndərir, əvəzində daha perspektivli gəncləri A komandamıza qazandırırıq. Kəsəsi, qapıçıyla müqaviləmiz var və onu heç yerə buraxası deyilik. Bu məsələ müzakirə mövzusu belə deyil".
Nicat Mehbalıyevin qapıçı bacarığı, oynamaq potensialı ilə bağlı "Sabah" akademiyasında qapıçıları yetişdirən Xəyal Zeynalovun da reaksiyasını öyrəndik:
"Nicat Mehbalıyevin məsələsi klubdaxili məsələdi. Bu barədə mənim nəsə deməyim düzgün çıxmaz. Məsələylə bağlı klub rəsmləri fikir bildirsə, yaxşı olar. Amma Nicatın sırf qapıçı xüsusiyyətlərinə gəlincə, pis qolkiper deyil. Unutmayaq ki, Nicat iki il öncə "Qəbələ"nin heyətində özünü yaxşı tərəfdən göstərdi, orda "1 nömrə"yə çevrildi. Amma yenə də "Sabah"da qapı xəttində kimin yer alıb-almayacağını baş məşqçi Murad Musayev qərar verir. Komandada kimin qalıb-qalmayacağını isə klub rəhbərliyi müəyyənləşdirir".
Təcrübəli menecer Tural Əsgərovun da bununla bağlı fikirlərini öyrəndik:
"Qapıçı ilə klub arasındakı müqavilənin şərtləri haqqında məlumatlı deyiləm. Ona görə nəsə fikir bildirmək çox çətindi. Amma ümumi götürəndə, tərəflər müqavilə şərtlərini rəhbər tutmalıdı. Futbolçunun klubla müqaviləsi qüvvədədisə və klub müqavilə şərtləri daxilində ondan öhdəliklərini yerinə yetirməyi tələb edirsə, haqlıdı və göstərişlər yerinə yetirilməlidi. Yəni rəhbərlik istəsə, futbolçunu əvəzedici komandaya, hətta U-19-a da göndərə bilər. Təbii ki, futbolçu da istər maliyyə, istərsə də daha çox oynamaq ilə bağlı kluba şərtlərini irəli sürə bilər. Amma qarşı tərəfin də buna razılıq verməmək kimi bir seçimi, səlahiyyəti var. Bu məsələyə Nicat Mehbalıyevlə "Sabah" üzərində fokuslanmayıb, geniş miqyasda baxsaq, hazırda futbolda klublarla futbolçular arasında müqavilə detallarında incəliklər vacib şərtdi".
ABDULLA İSMAYILOĞLU
Digər xəbərlər
