Misli premyer-liqasının 7-ci turunda səfərdə “Səbail”in qonağı olan "Araz-Naxçıvan" oyun ərzində yaratdığı çoxsaylı qol epizodlarını boşa verdi və yekundə minimla hesabla məğlub oldu.

"Football-plus.az" xəbər verir ki, matçda ən çox diqqətçəkənlərdən biri də Orxan Əliyev idi. Cari çempionatda vurduğu 3 qolla komandasının hələ ki ən sərrast oyunçusu olan Orxan “Səbail”lə dueldə də azı 2 dəfə rəqib torunu silkələməyə yaxın oldu. “10 nömrə”nin arazpfk.com-a müsahibəsini diqqətinizə çatdırırıq.

- “Səbail”lə oyun nə ilə yadda qaldı?
- Maraqlı oyun oldu. “Araz-Naxçıvan” premyer-liqaya bu il yüksəlsə də, oyun planında yaxşı mənada hər kəsi təəccübləndirir. Çalışırıq ki, oyunu meydanın rəqibə aid hissəsində keçirək. Qol vurmaq üçün epizodlarımız da çox oldu. Onların hansısa birinindən düzgün istifadə edə bilsəydik, nəticə fərqli olacaqdı. Təəssüf ki, üstün oynadığımız oyunda məğlub olduq. Futbolun bu tərəfi də var.

- Demək olar mı, oyunun nəticəsini sənin qaçırdığın epizodlar həll etdi?
- Fərqlənmək üçün hər zaman epizod olur. Əlbəttə, mən də yaxaladığım qol epizodlarını dəyərləndirməyi hamıdan çox istəyirdim. Bilirəm, dünən qaçırdığım imkanlara görə məni qınayırlar. Özüm də pis olmuşam. Anlayıram ki, hər şeyi dəyişə bilərdim.

- Tələsirdin?
- Tələsmirdim. Birinci epizod zamanı cərimə meydançasına girən zaman bir ötürmə ilə zərbə vurmaq istədim, alınmadı. Sonrakı imkan zamanı uzaq küncü nişan almağa çalışdım, bu dəfə də məqsədimə çata bilmədim, top qapıçıya dəydi. Təəssüflənməmək olmur.

- Bu matçdakı nəticə hər iki komandanın turnir cədvəlinin üstü sıralarında qərarlaşmasına kömək edəcək, həm də aşaığ pillələrdəki digər klublarla xal fərqini artıracaqdı…
- Razıyam, biz qələbə qazansaydıq, ikinci pilləyə yüksələcəkdik. Çox pis olmuşam. Yadıma düşəndə heyifslənirəm.

- Növbəti oyun lider “Zirə”yə qarşı olacaq. Bu duellə bağlı nə düşünürsən?
- Bu gün bərpa məşqi keçdik. Oyunun hazırlığına sabahdan başlayacağıq. Güclü rəqibdi. Birinci yerdə qərarlaşmaları təsadüfi deyil. Yaxşı hazırlaşmalıyıq ki, qələbə qazanaq. Şansımız var. Ümumiyyətlə, biz heç vaxt meydana çıxanda heç-heçə haqda düşünməmişik. Baş məşqçi bizdən hər zaman qələbə istəyir. Onun oyun fəlsəfəsi budu. “Neftçi” və ya “Qarabağ”la oyunlarımızda da məqsəd eyni olub. Biz də onun tapşırığını yerinə yetirməyə çalışırıq. Yaxşı oyunu nəticəyə daşımalıyıq. Çünki xalı oyuna yox, nəticəyə görə verirlər.

- Ötən il Birinci divizionda bombardir olmuşdun. Premyer-liqada da işlərin pis getmir, komandanın ən çox qol vuran oyunçususan…
- Birinci divizionda da qol vurmaq asan deyildi. Düzdü, premyer-liqa ilə aşağı dəstəni müqayisə etmək olmaz. Sadəcə, öz üzərində çox çalışmalısan. O qədər çalışmalısan ki, cərimə meydançasında qərarı tez və düzgün verməyi bacarasan.