Misli premyer-liqasında 7-ci turun "Sabah" - "Kəpəz" matçı keçirilib - 2:2.

"Football-plus.az" xəbər verir ki, oyundan sonra gəncəlilərin çalışdırıcısı Azər Məmmədovun mətbuat konfransı keçirilib. Sizi onun fikirləri ilə tanış edirik:

- Aktivinizdəki 5 xalı güclü rəqiblərlə oyunlarda qazanmısız. Digər rəqiblərlə oyununuzun alınmamasının səbəbi nədi?
- Bir yandan sevindirici haldı ki, "Kəpəz" güclü komandalara qarşı yaxşı oyun nümayiş etdirir. Ancaq təəssüf edirəm ki, bizə yaxın olan rəqiblərə Gəncədə məğlub oluruq. Öz səhvlərimizdən olan məğlubiyyətlərdi. Çatışmazlıqları axtarırıq.

- "İstefa" şüarları komandaya təsir edir?
- "İstefa" şüarı bir az mənfi obraz yaradır. Amma bu kəlmənin çox böyük dəyəri var. Bəzən biz sözün dəyərini ucuzlaşdırırıq. Lazımlı və lazımsız yerlərdə "istefa" şüarı işlədilir. 6 turdan sonra yeni qurulan komandanın baş məşqçisinin istefası tələb olunursa, mən deməyə söz tapmıram. Hər "istefa" şüarından sonra kimsə istefa verəcəksə, bu, o insanın zəifliyidi. Mən zəif adam deyiləm. İnanıram ki, yaxşı işlər görəcəyik.

- Tərlan Əhmədovun dönəmində Gəncədə bir neçə cəbhə var idi. İndi də eyni vəziyyətdi?
- "Kəpəz"də fərqi yoxdu bakılı işlədi, yevlaxlı və ya gəncəli işlədi. Kimin bacarığı varsa, işləmək onun haqqıdı. Gəncəli və ya bakılı olduğuna görə kiminsə istefası tələb olunursa, bunun qəti şəkildə əleyhinəyəm. Cəbhəyə gəlincə, düşünürəm ki, Gəncədə işləmək çətindi. Amma hər şeyə rəğmən"Kəpəz"in baş məşqçisi olmaq çox qürurvericidi. Ağır hər olduğunu bura gələndə bilirdim. Mən qorxaq adam deyiləm, bacardığımı etməyə çalışacam.

- "Kəpəz"in sərgilədiyi oyun sizi qane edir?
- Arxaya boylansaq, görərik ki, biz də məğlubiyyətləri qapıçı səhvlərinə görə almışıq. Bu, futboldu. Şuaybu qapıçının üstünə getməsəydi, səhv olmayacaqdı. Oyuna gəlincə, hər komandanın maksimal gücü var. Etiraf edim kı, hazırda komandam "bir nömrə" oynamaq gücündə deyil. Ona görə də çalışırıq ki, xallar qazanıb premyer-liqada qalaq.