Startı sentyabrın 20-də bir oyunla verilən Konfrans Liqasının (KL) qrup mərhələsinin ilk turuna ertəsi gün yekun vuruldu. İkinci oyun günündə 15 matç keçirildi.

“Football-plus.az” xəbər verir ki, əvvəlcə UEFA-nın 2021/22 mövsümündən təşkil etdiyi 3-cü klub turnirinin reqlamentini xatırladaq. Qrup turnirində 32 komanda iştirak edəcək. İştirakçılar hərəsində 4 komanda olmaqla 8 qrupa ayrılıb. Qrup mərhələsinə dekabrın 14-nə təyin olunan 6-cı turun matçları ilə yekun vurulacaq. İkidövrəli sistemlə keçiriləcək yarışda qruplarda ilk yeri tutacaq komandalar 1/8 finala birbaşa vəsiqə qazanacaq. Qrup ikinciləri isə Avropa Liqasının (AL) qruplarında 3-cü yeri tutacaq komandalarla KL-in 1/8 finalına vəsiqə uğrunda pley-off oyunu keçirəcək.

Qeyd edək ki, Avropanın 5 aparıcı liqasının təmsilçiləri KL-də mübarizəyə sonuncu seçmə mərhələ sayılan pley-offdan qoşulmuşdu. Reytinqi yüksək olan ölkələrdən İspaniya bu mərhələdə yeganə komandasını itirib. “Osasuna” iki oyunun nəticəsinə (1:2, 2:2) əsasən “Brügge”yə məğlub olub. Almaniya, İngiltərə, İtaliya və Fransanın hərəyə bir klubu isə həmin mərhələni adlayıb. “Böyük beşliy”i qruplarda uyğun olaraq “Ayntraxt” (Frankfurt), “Aston Villa”, “Fiorentina” və “Lill” təmsil edir. Bu komandalar ilk turda fərqli nəticələr göstərdilər.
Qrup mərhələsinə ayın 20-də Villnev d’Ask şəhərində start verildi. Yerli “Lill” “Qarabağ”ın AL-in pley-off mərhələsində mübarizədən kənarlaşdırdığı (2:0, 1:1) “Olimpiya”nı hər hissənin sonunda vurduğu bir qolla məğlub etdi. “Ayntraxt” Frankfurtda “Aberdin”ə 2:1 hesabıyla qalib gəldi. Polşadakı matç yetərincə baxımlı keçdi. “Legiya” - “Aston Villa” oyununun ilk hissəsi 2:2 hesabı ilə nəticələndi. Varşavalıların albaniyalı hücumçusu Muçi fasilədən sonra daha bir qol vurmaqla ingilislərin 2:3 hesablı məğlubiyyətini rəsmiləşdirdi. KL-in son finalçısı “Fiorentina” isə Belçikada “Genk” ilə məhsuldar heç-heçəyə (2:2) razılaşdı.

Postsovet məkanı qrup mərhələsində iki komanda ilə təmsil olunur. “Zarya” məlum səbəbdən “Gent”lə ev oyununu Sloveniyanın Lyublyana şəhərində keçirdi. Ukrayna komandası 1:1 hesablı heç-heçəyə nail oldu. “Astana” isə Zaqrebdə darmadağına məruz qaldı. Qazaxıstan klubu “Dinamo”ya 1:5 hesabıyla məğlub oldu. Ev sahiblərinin və yığmamızın hücumçusu Mahir Emrelinin start heyətində meydana çıxdığını və 65-ci dəqiqədə əvəzləndiyini qeyd edək.

qrup mərhələsi, 1-ci tur
A qrupu
Lill (Fransa) – Olimpiya (Sloveniya) 2:0
Devid, 43-p. Yazıcı, 90+4.
Lill: Şevalye, Yumtiti, Qudmundsson, Diakite, Tyaqo Santuş (Ribeyro, 46), Andre, A.Qomes, Jeqrova (Yazıcı, 46), Haraldsson (Virjinius, 90), Kavalyero (Kabella, 69), Devid.
Slovan (Slovakiya) - Klaksvik (Farer adaları) 2:1
Vayss, 54. Çavriç, 74 – Pavloviç, 49.
Növbəti turun oyunları oktyabrın 5-də keçiriləcək: Olimpiya – Slovan, Klaksvik – Lill.

B qrupu
Makkabi (Təl-Əviv, İsrail) - Breydablik (İslandiya) 3:2
Makin, 11. Zahavi, 24. Biton, 32 – K.Olsen, 44; 52.
Zarya (Ukrayna) - Gent (Belçika) 1:1
Gerrero, 70 – Kuypers, 67.
5 oktyabr: Breydablik – Zarya, Gent - Makkabi T-Ə.

C qrupu
Dinamo (Xorvatiya) - Astana (Qazaxıstan) 5:1
Petkoviç, 43-p.; 53-p. Bulat, 58. Marin, 85. Haliloviç, 90+3 – Ohanesyan, 78.
Viktoriya (Plzen, Çexiya) - Ballkani (Kosovo) 1:0
Kalvax, 78.
5 oktyabr: Ballkani – Dinamo, Astana – Viktoriya P.

D qrupu
Brügge (Belçika) – Beşiktaş (Türkiyə) 1:1
Vanaken, 77 – Tosun, 88.
Luqano (İsveçrə) - Bude/Qlimt (Norveç) 0:0
5 oktyabr: Bude/Qlimt – Brügge, Beşiktaş – Luqano.

E qrupu
Legiya (Polşa) - Aston Villa (İngiltərə) 3:2
Vşolek, 3. Muçi, 26; 51 – Duran, 6. Din, 38.
Aston Villa: Martines, Din, Lanqle, Çembers (Keş, 67), Konsa, Makqinn (Diabi, 61), Tilemans, Beyli, Kamara (Duqlas Luis, 61), Zanyolo (Remzi, 67), Duran (Uotkins, 61).
Zrinski (Bosniya və Hersoqovina) - Alkmaar (Niderland) 4:3
Kojul, 48; 81. Çorluka, 68. Hrvanoviç, 71 – Van Brederode, 10. Meynans, 32. Dani de Vit, 44.
5 oktyabr: Alkmaar – Legiya, Aston Villa – Zrinski.

F qrupu
Genk (Belçika) - Fiorentina (İtaliya) 2:2
Zeçiri, 12. Makkenzi, 85 – Ranyeri, 7; 23.
Fiorentina: Kristensen, Biraqi (Parizi, 63), Milenkoviç, Ranyeri, Kayode, Artur, Dunkan, Mandraqora (M.Lopes, 63), N.Qonsales (Kuame, 63), Sottil (Brekalo, 72), Beltran (Nzola, 72).
Ferentsvaroş (Macarıstan) - Çukariçki (Serbiya) 3:1
Varqa, 44-p. Ovusu, 45+7. Peşiç, 79 – İvanoviç, 26.
5 oktyabr: Fiorentina – Ferentsvaroş, Çukariçki – Genk.

G qrupu
Ayntraxt (Frankfurt, Almaniya) - Aberdin (Şotlandiya) 2:1
Marmuş, 11-p. Kox, 61 – Polvara, 22.
Ayntraxt: Trapp, Kox, Nkunku (Knauff, 68), Paço, Smolçiç, Rode (Larsson, 39), Götse (Şaibi, 46), Şxri, Ebimbe, Aaronson (Nqankam, 46), Marmuş (Buta, 82).
HİK (Finlandiya) - PAOK (Yunanıstan) 2:3
Bande, 35. Raduloviç, 90+9 – Kulierakis, 55. Despodov, 81. Lyamas, 90+4.
5 oktyabr: Aberdin – HİK, PAOK - Ayntraxt F.

H qrupu
Fənərbaxça (Türkiyə) - Nordşelland (Danimarka) 3:1
Krespo, 24. Batşuayi, 30. Əziz, 47 – Villadsen, 55.
Ludoqorets (Bolqarıstan) - Spartak (Slovakiya) 4:0
Yordanov, 46. Petrovski, 50; 63. Ruan Seko, 90+4.
5 oktyabr: Nordşelland – Ludoqorets, Spartak - Fənərbaxça.