"Oyundan əvvəl də dediyim kimi, dünən "Molde" oyunu əks-hücumlar üzərində qurmuşdu. "Qarabağ" top itkilərindən sonra dərhal pressinq tətbiq edərək rəqibin təhlükəli hücumlarına imkan yaratmırdı. "Qarabağ" kimi komandaya qarşı qapalı oynamaq lazım deyil, onların topla rahat oynamasına mane olmaq lazımdı. Bu cəhətdən "Rakuv" "Qarabağ"ı yaxşı təhlil etmişdi. Fikrimcə, "Molde"nin baş məşqçisi "Qarabağ"ı düzgün təhlil etməmişdi. "Qarabağ" rəqibdən asılı olmayaraq, dominant futbol oynamağı sevir. Dünən də həm təcrübə, həm də keyfiyyət baxımından futbolçularımız rəqibdən üstün idi. Düşünürəm ki, çoxlu qol imkanından yararlana bilməməyimizin səbəbi, sadəcə, qeyri-dəqiqlik oldu. Futbolçuların həlledici məqamlarda verdikləri qərarlarda hansısa problem yox idi, müəyyən bəxtsizliklər oldu. Ümumiyyətlə, "Qarabağ"ın qrupdan çıxmaq şansı çoxdu. Ən çətin rəqib "Bayer"di, almanlar birinci yer üçün oynayırlar. Yenə də "Qarabağ" qrupu lider kimi tamamlamağı bacara biləcək komandadı. Reallıq odu ki, qalan üç komanda qrupda 2-ci yer üçün mübarizə aparır. "Qarabağ" dünənki oyunu ilə göstərdi ki, qrupdan çıxa bilər".