“Mariya Stadnikin uğursuzluğu şəxsi həyatı ilə bağlıdı. Çünki Mariyanın 35 yaşı var və iki övladına da özü baxır. İdmanla şəxsi həyatı tənzimləmək çox çətindi. Həmçinin də ölkəsi Ukraynada gedən hadisələr onun karyerasını təsir göstərir. Biz Mariyanın məşqlərdəki özünəinamını, yaşına baxmayaraq, həvəslə mübarizə apardığını görürük. Heç kim onu məcbur etmir ki, gəl, məşq elə. Həqiqətən də canını qoyur. Düzdü, onun bu nəticəsi mənim üçün sürpriz oldu, lakin qrupa da baxanda görürdük ki, amerikalı ilə mübarizə aparmaq çətindi. Amma əminliklə deyə bilərəm ki, Bakıda keçiriləcək lisenziya xarakterli turnirdə Mariya çempion olaraq lisenziyanı qazanacaq. Digər idmançılara gəlincə, Elis Manolova Avropa çempionudu. Ancaq Elisdə də son vaxtlar heç nə alınmır. Səbəbini mən bilmirəm. Bunu baş məşqçi Semyon Şterev yaxşı bilər. Elnurə və Birgül isə böyük güləşə yeni gəldiyi üçün uyğunlaşma prosesi lazımdı. Hər iki idmançımız gənclər arasında Avropa çempionu olub. İnanıram ki, Elnurə ilə Birgül gələcəkdə lisenziya qazanacaqlar. Alyona da 5-ci oldu və pis çıxış etmədi. Medala çox yaxın idi, lakin kiçik səhvlər üzündən bunu əldən verdi. Bunu fiasko adlandırmazdım. Komandamız yenilənib, üç nəfər gənclərdən əsas komandaya cəlb olunub. Ötən il də qızlarımızda uğursuzluq olmuşdu. Belə hallar qadın güləşində baş verir. Amma sizə əminliklə deyə bilərəm ki, komandamız növbəti iki yarışda lisenziya qazanacaq”.