Serbiyanın paytaxtı Belqradda keçirilən güləş üzrə dünya çempionatı davam edir.

“Football-plus.az” xəbər verir ki, yarış təmsilçilərimiz üçün o qədər də uğurlu keçmir. Hələ ki yalnız Maqomedxan Maqomedov finala çıxıb və Paris Olimpiadasına lisenziya qazanıb. Digər idmançılarımızdan Turan Bayramov (74 kq) Rusiya əsilli serbiyalı Xetik Çabolovla məğlub olub. Bayramov Olimpiadaya lisenziya verən 5-ci yer uğrunda görüşdə - yunanıstanlı Georgios Kuqiomsidislə qarşılaşmada 8:0 öndə olduğu halda, 8:8 başa vurub və 3 dəfə cərimə balı aldığı üçün uduzub. Medallara iddialı Hacı Əliyev isə 1/4 finalda erməni rəqibi Vazgen Tevanyana uduzub. Bəs, görəsən, sərbəst güləşçilərin turnirdə bu qədər uğuruz çıxış etməsinin səbəbi nədi? Bununla bağlı iki tanımış məşqçinin - Abil İbrahimovla Qırxlar Bədəlovun fikrini öyrəndik.

Abil İbrahimov (Turan Bayramovun şəxsi məşqçisi): “Turandan çox şey gözləyirdik. Mənə görə Turan yorulduğu üçün bu oyunu əldən verdi. Yunanıstanlı rəqibi isə bu il Avropa Çempionu olmuşdu. Yəni zəif rəqib deyildi. Bu idmandı, hər şey ola bilər. Bizim idmançılar da bu yarışda medal qazanmaq istəyir. Çalışacağıq ki, lisenziya xarakterli turnirlərdə lisenziya qazanaq. Əsas Olimpiya Oyunlarıdı. Bizdə belə şeylər çox olub. Yadınızdadısa, Namiq Abdullayev dünya çempionatında lisenziya ala bilmədi, lakin lisenziyalı xarakterli turnirdə lisenizya qazanaraq olimpiya çempionu oldu. Hacı Əliyev də həmçinin”.

Qırxlar Bədəlov (Hacı Əliyevin şəxsi məşqçisi ): “Hacı Əliyevin çıxışı uğurlu olmadı. Turnirə yaxşı hazırlaşmışdı. Erməni rəqibi Tevanyanla görüşdə məğlubiyyətin səbəbi emosiyalara qapılması idi. Çünki görünürdü ki, Hacı bu görüşə əsəbi çıxıb. Əslində bu mərhələdən əvvəl qalib gəldiyi monqolustanlı Tulqa Tumur Oçir Vazgendən güclü idi. Sadəcə, psixoloji amil Hacını bu vəziyyətə saldı. Turan Bayramovun görüşünə gəlincə, çox pis çıxış etdi. 8:0 öndə olduğun görüşü əldən vermək nə deməkdi? Mənə görə Turanın fiziki cəhətdən yaxşı olmaması uduzmasına səbəb oldu”.

Azərbaycan güləş millisinin sabiq baş məşqçisi Firdovsi Umudovu danışdırmaq istəsək də, razı olmadı: “Zəhmət olmasa, federasiyada işləyən bir şəxsi danışdırın. Mən bu barədə heç nə demək istəmirəm. Güləşçilərimizə də uğurlar arzulayıram”.

Xatırladaq ki, sərbəst güləşdə (57 kq, 65 kq, 74 kq, 86 kq, 97 kq, 125 kq) və qadın güləşində (50 kq, 53 kq, 57 kq, 62 kq, 68 kq, 76 kq) ilk 5 ueri tutanlar Paris Olimpiadasına lisenziya qazanacaq.

CAVİD ƏLİYEV