Çoxu bitirib, “Zirə” ilə “Kəpəz” hələ də axtarır
Misli premyer-liqasında yay “transfer pəncərəsi” sentyabrın 5-də bağlansa da, klublar azad agent statusuna malik futbolçularla müqavilə bağlaya bilər.
Maraqlıdı ki, 6-cı turun oyunlarının keçirilməsinə baxmayaraq, hələ də yeni oyunçularla anlaşan komandalar var. Belədə premyer-liqa təmsilçilərinə iki sualla müraciət etməyi lazım bildik: heyətin komplektləşdirilməsi başa çatıbmı, çatmayıbsa, hansı mövqeləri gücləndirmək istəyirsiz?
Murad Musayev (“Sabah”ın baş məşqçisi):
“Bəli, proses başa çatdı. Yola əlimizdəki heyətlə davam edəcəyik”.
Elmar Baxşıyev (“Qəbələ”nin baş məşqçisi):
“Əlbəttə, işlərimizi yekunlaşdırmışıq”.
Ayxan Abbasov (“Turan Tovuz”un baş məşqçisi):
“Futbolçuların transferiylə bağlı işlər başa çatıb. Lakin əlimizə çox yaxşı fürsət düşsə, qaçırmamağa çalışacağıq”.
Azər Bağırov (“Araz-Naxçıvan”ın baş məşqçisi):
“Heyət artıq komplektləşib. Ən azı qışa qədər yeni transfer etmək fikrimiz yoxdu”.
Şahin Diniyev (“Səbail”in baş məşqçisi):
“Bu istiqamətdə bütün çalışmalarımız sona çatıb. Yeni futbolçuya ehtiyac yoxdu”.
Azər Məmmədov (“Kəpəz”in baş məşqçisi):
“Xeyr, daha bir hücumçu transfer etmək istəyirik. O heyətə qatıldıqdan sonra proses bitmiş sayılacaq”.
Rəşad Sadıqov (“Zirə”nin baş məşqçisi):
“Hələ ki tam komplektləşməmişik. 2-3 futbolçu ilə danışıqlar aparırdıq, lakin alınmadı. Hücumameyilli yarımmüdafiəçi və mərkəz müdafiəçisi transfer etmək istəyirik”.
Qurban Qurbanov (“Qarabağ”ın baş məşqçisi):
“Böyük ehtimalla qış aylarına kimi bitib. Çünki biz ancaq azad agent statusuna malik oyunçuları götürə bilərik. Onun hansı formada olacağı da böyük sual altındadı. Ola bilər ki, dekabra kimi transfer olmasın. Amma bəlkə oldu. Hücum xəttinə, müdafiəyə, yarımmüdafiəyə oyunçu istərdim”.
Samir Abasov (“Sumqayıt”ın baş məşqçisi):
“Komandam tam komplektləşib və hazır vəziyyətdədi. Növbəti “transfer pəncərəsi”nə qədər yeni oyunçu almaq nəzərdə tutulmur”.
Təəssüf ki, “Neftçi”nin baş məşqçisi Adrian Mutu ilə əlaqə saxlamaq cəhdimiz baş tutmadı. O, zənglərə və mesajlara cavab vermədi.
KƏNAN BAHADIR
Digər xəbərlər
