Cümə axşamı Avropa Liqasında qrup mərhələsi start götürəcək. “Qarabağ” bu turnirin H qrupunda ilk oyununu evdə “Molde” ilə keçirəcək.

Ağdamlıları olduqca çətin oyun gözləyir. Çünki “Molde” təhlükəli komandadı. Erlinq Moenin rəhbərlik etdiyi kollektiv ölkə çempionatında 21 oyundan sonra 40 xalla 4-cü pillədə qərarlaşıb.

“Molde” Norveç çempionatının son turunda “Odd”u qəbul edib. Oyun meydan sahiblərinin xeyrinə başa çatıb – 4:1. Moe bu oyunçulara güvənib: 1. Yakob Karlström, 28. Kristoffer Haugen, 25. Andres Haqelskayer, 2. Martin Byörnbak, 3. Kasper Öyvann, 31. Matias Lövik, 16. Emin Breyvik (50. Qustav Kyöştad Niheym, 86), 15. Markus Andre Kaasa (20. Kristian Eriksen, 74), 5. Eyrik Heştad (22. Maqnus Qrödem, 74), 9. Veton Berişa (7. Maqnus Volff Eykrem, 67), 10. Erik Kitolano
(8. Fredik Qulbrandsen, 67).

“Molde” 3-5-2 taktiki sxemindən istifadə edib. Moenin “Qarabağ”a qarşı da eyni taktikadan istifadə edəcəyini düşünmək olar. Lakin yarımmüdafiənin sağında və solunda yer alan futbolçuların daha çox müdafiəyə kömək edəcəyini indidən söyləyə bilərik. Çempionat oyununda hiss olundu ki, “Molde” hücum quran zaman cinahlara yönəlir. Yəni burda yer alan futbolçular müdafiəni yararaq mərkəzə doğru ötürmə edir. Son nöqtəni qoyan pleymeyker Heştaddan və hücumlar Berişa ilə Kitolanodan ehtiyatlanmaq lazımdı. Çünki adı çəkilən oyunçular dəqiq zərbələrlə diqqəti çəkirlər. Son görüşdə Heşdatın dubl etməsi dediklərimizin əyani sübutudu.

Moldenin əvəzetmələrinə də diqqət yetirmək lazımdı. 53 yaşlı mütəxəssis çempionat matçında hücumçuları Eykrem və Qulbrandsenlə əvəzlədi. Onlar da “Odd”la matçda fərqlənərək məşqçinin güvənini qazandılar.

“Molde” hazırda çox yaxşı formada olan komandadı. Lakin “Qarabağ”ın bu rəqibi məğlub edəcəyini düşünmək olar. Qurban Qurbanovun komandası mərkəzdə topa nəzarət etsə, rəqibin müdafiəsinin səhvlər etməsinə şərait yarada bilər.

İLKİN SULTANLI