AİJA nümayəndələri ötən il oktyabrın 30-dan noyabrın 2-dək Pakistanın Pişəvər şəhərində keçirilən “Sülh və idman” beynəlxalq konfransında Rumıniyadan, Malayziyadan, Səudiyyə Ərəbistanından, Əfqanıstandan, Şri-Lankadan, Cənubi Koreyadan olan həmkarları ilə birlikdə iştirak etmişdilər. Həmin tədbirdə AİJA ilə PSWF arasında dostluq və birgə əməkdaşlıga dair memorandum imzalanmışdı.

"Football-plus.az" xəbər verir ki, anlaşmaya əsasən ötən il dekabrın 20–24-ü aralığında Azərbaycan İdman Jurnalistləri Assosiasiyası (AİJA) ilə Pakistan İdman Yazarları Federasiyasının (PSWF) birgə təşkilatçılığıyla keçirilən "Rəqəmsal idman jurnalistikası" mövzusunda 5 günlük ödənişsiz beynəlxalq treninqdə ölkəmizlə yanaşı, qardaş Pakistandan, Əfqanıstandan, Şri-Lankadan və digər ölkələrdən ingilis dilini bilən 100-dən çox idman jurnalisti və jurnalistika fakültələrinin tələbələri iştirak edərək beynəlxalq sertifikata yiyələndilər.

İştirakçıların göndərdikləri çoxsaylı məktublar, rəylər onu deməyə əsas verir ki, AİJA-nın 1-ci vitse-prezidenti, Avropa İdman Mətbuatı İttifaqı (AIPS EUROPE) İcraiyyə Komitəsinin üzvü Nərgiz Mahmudzadənin moderatorluğu, Beynəlxalq İdman Mətbuatı Assosiasiyasının (AİPS) prezidenti, dünyaca məşhur “La Gazetta dello Sport” qəzetinin yaradıcılarından biri və əməkdaşı Canni Merlo (İtaliya), AIPS-in 1-ci vitse-prezidenti Esat Yilmaer (Türkiyə), AIPS EUROPE prezidenti Çarlz Kamenzuli (Malta), AIPS ASIA prezidenti Hee Don Jung (Cənubi Koreya), PSWF prezidenti, AIPS ASIA-nın baş katibi, AIPS İcraiyyə Komitəsinin üzvü Amjad Əziz Malik (Pakistan), dünyaca məşhur idman jurnalisti, AIPS Futbol Komissiyasının sədri, “World Soccer” jurnalının yazarı Keyr Rednec (Böyük Britaniya), Şri-Lanka İdman Jurnalistləri Assosiasiyasının prezidenti Ramkrrish, AİJA-nın 1-ci vitse prezidenti, AIPS EUROPE İcraiyyə Komitəsinin üzvü Nərgiz Mahmudzadə (Azərbaycan), İctimai Televiziyadan Elnur Əliyev (Azərbaycan) və başqa mentorların iştirakı ilə uğurla araya-ərsəyə gələn bu treninq jurnalistlərin rəqəmsal media sahəsində beynəlxalq təcrübəyə yiyələnməsinə və bu sahədə peşə vərdişlərini təkmilləşdirməsinə əhəmiyyətli dərəcədə müsbət təsir göstərə bildi.

Əvvəlcədən razılaşmaya görə qabaqcıl media qurumlarının fəaliyyəti ilə yaxından tanış olmaq üçün ölkəmizdən treninqdə fəal iştirak edən bir qrup jurnalistin Pakistan paytaxtı İslamabada, qardaş ölkədən olan həmkarlarımızn isə Bakıya səfəri nəzərdə tutulurdu. Həmin vaxt yetişdi və həmkarlarımız sentyabrın 9-da paytaxtımıza təşrif buyurdu. 9 nəfərlik qrupdakı aşağıdakı jurnalistlər yer almışdı:

Məhəmməd Asgar - Pakistan İdman Yazarları Federasiyasınln baş katibi
Məhəmməd Şueeb - idman jurnalisti, “Daily Jang” qəzeti
Hina Malik - tələbə, “İqra National Universitetinin” Media Təhsili şöbəsi
Adnan Başir - idman jurnalisti, “Kasoti Digital”
Şahid Xan - idman jurnalisti, “News Network Internatıonal( NNI)”
Rehan Əhmad Xan - idman jurnalisti, frilans
Məhəmməd Umer - idman Jurnalisti, “Aayın” qəzeti
Mişah Ullah - idman jurnalisti, “Difa News” və MKTV
Tehsenn Ullah - idman jurnalisti, “Samaa” TV

Sentyabrın 9-da qonaqları Heydər Əliyev Beynəlxalq Hava Limanında AİJA rəsmiləri qarşıladı. Ayın 10-u səhər saatlarında isə qardaş ölkədən gəlmiş gənc jurnalistlər Fəxri Xiyabanı, Ulu Öndər Heydər Əliyevin, görkəmli oftalmoloq alim Zərifə Əliyevanın məzarlarını ziyarət etdilər.

Milli mətbuatımızın banisi Həsən Bəy Zərdabinin xatirəsi də hörmətlə yad olundu. Treninq turu iştirakçıları Şəhidlər Xiyabanında uyuyan qəhrəmanlarımızın məzarlarına tər çiçəklər düzdülər.

Qonaqların Bakıya treninq turu 7 gün davam etdi. Onlar Pakistan İslam Respublikasının ölkəmizdəki səfirliyində qəbul edildilər, AzərTac, AzTV, İdman TV, Mətbuat Şurası, “Report” İnformasiya Agentliyini ziyarət etdilər. Bundan əlavə, həmkarlarımız Milli Olimpiya Komitəsi, Bakı Olimpiya Stadionu, AİJA-nın güləş bölməsi və bir neçə başqa media və idman qurumlarında oldular. Dünən isə Azərbaycan Milli Olimpiya Komitəsində AİJA-nın “Rəqəmsal idman jurnalistikası” layihəsinin 2-ci mərhələsinin Azərbaycan turunun yekunlarına həsr olunan tədbir keçirildi. Görüşdə Azərbaycan Milli Olimpiya Komitəsinin vitse-prezidenti Çingiz Hüseynzadə, baş katibi Azər Əliyev, AİJA prezidenti Eldar İsmayılov və qonaqlar iştirak etdi.

Qonaqları və media nümayəndələrini salamlayan Çingiz Hüseynzadə belə layihələrin önəmindən danışdı və davamlı olmasını tövsiyə etdi. Qarşılıqlı xatirə hədiyyələrinin təqdim olunması və xatirə fotosu ilə tədbirə yekun vuruldu.

Maraq üçün bildirək ki, əməkdaşımız İlkin Sultanlı da noyabrda həyata keçirilməsi planlaşdırılan azərbaycanlı idman jurnalistlərinin Pakistan səfərinə yollanacaq şəxslər arasında yer alacaq. O da "Rəqəmsal idman jurnalistikası" seminarında iştirak edib və beynəlxalq serfikata yiyələnib.