Aleksey Kaşukla Coy-Lens Mikels gedəndən sonra "Sabah"ın güc itirdiyi hər kəsə bəllidi. "Partizan"la cavab görüşündəki məğlubiyyətdən sonra “tələbələr” mənəvi-psixoloji və oyun böhranı yaşayır. Çıxış yolu axtaran rəhbərlik əvvəlcə karyerası Rusiya klubları ilə bağlı olan Ayaz Quliyevi gətirdi.
Dünən isə artıq Əlcəzair yığmasının üzvü İshak Belfodolin keçidi açıqlandı. Heç şübhəsiz, İshak komandaya böyük ümidlərlə gətirilib. Bəs o, Kaşukla Milkelsin yerini doldura biləcəkmi? Yaxud “dişsiz” Volkovla Apehdən üstün olacaqmı?
Fransanın futbol məktəblərində yetişən əlcəzairli zəngin karyeraya malikdi. Peşəkar karyerasına 2009-cu ildə “Lion”da başlayıb. Ardından İtaliyanın "Bolonya", "Parma", "İnter", "Livorno", BƏƏ-nin "Bani Yas", Belçikanın "Standard", Almaniyanın "Verder", "Hoffenhaym", "Herta" klublarında çıxış edib. Ucaboy (192 sm) hücumçunun sonuncu klubu Qətər "Əl-Qarafa"sı olub. Yığma karyerasına gəlincə, Fransanın bütün aşağı yaş qruplarında oynayandan sonra 2013-də Əlcəzairi seçib və həmin vaxtdan 2022-yə qədər milli formada keçirdiyi 19 oyunda iki qol vurub.
Futbolçunun karyerası zəngin olsa da, illərlə “böyük beşlik” ölkələrində çıxış etsə də, qol duyumu yüksək deyil. Hücumçunun işi rəqib qapılarına yol tapmaqdı. Amma əlcəzairli çıxış etdiyi klublarda bombardir olmağı bacarmayıb. "Parma"da 9, "Standart"da 2 ilə 11, "Verder"də bir mövsümdə 4, "Hoffenhaym"da 3 ilə 16, "Herta"da 1 ilə 5 dəfə qol sevinci yaşayıb. Bu göstəricilər hücum oyunçusu üçün qənaətbəxş deyil. Təbii ki, onun çıxış etdiyi liqaların səviyyəsi, rəqabət də nəzərə alınmalıdı. Amma məsələ ondadı ki, "Bani Yas" və "Əl-Qarafa"da da yüksək məhsuldarlıq göstərməyib. BƏƏ təmsilçisində bir mövsümdə 11, Qətər klubunda isə 5 qola imza atıb.
İstənilən halda, Belfodilin başla yaxşı oynadığını, təcrübəsini nəzərə alsaq, "bayquşlar"a faydalı olacağını düşünürük. "Sabah" standart vəziyyətlərə önəm verən komandadı, deməli, əlcəzairli “ikinci mərtəbədə” effektli ola bilər. Həmçinin Masazır təmsilçisində Letiç, İsayev kimi irəlidəki oyunçuları topla təmin edən futbolçuların olduğunu nəzərə alsaq, Belfodilin qol imkanları çox olacaq. Həmçinin klubda Vinsent Till, Jarl Marqarita, Maruan Hadudi kimi oyunçuların yer alması əlcəzairlini darıxmağa qoymayacaq. Hər üç oyunçu fransızca danışa bilir, onuncu Şimali Afrikadan - Mərakeşdəndi, yəni Belfodil uyğunlaşma problemini də tez arxada qoyacaq. Yerdə qalır onun məşqlərdə özünü yaxşı tərəfdən göstərməsi və Murad Musayevin etimadını qazanması. Hesab edirəm ki, rusiyalı mütəxəssis İshakı ilk oyunlarda sonradam meydana buraxacaq və Mikelsin yerində sınayacaq. Yaxud da Volkov yorulanda onun əvəzinə nominal hücumçu kimi oynadacaq. Belfodilin vinger, yoxda forvard kimi komandaya xeyir verəcəyini yaşıl meydanda görəcəyik.
ABDULLA İSMAYILOĞLU