Torino” iki futbolçu ilə yollarını ayırıb.

Turinlilər yarımmüdafiəçi Yakopo Seqre və müdafiəçi Kristian Ansaldi ilə vidalaşıb. Seqre “Palermo”ya, Ansaldi isə “Parma”ya transfer olunub. Onlar yeni klubları ilə müvafiq olaraq, 3 və 1 illik müqaviləyə imza atıblar. 25 yaşlı Seqre “Torino”nun yetirməsi idi. Lakin italiyalı yarımmüdafiəçi Turin klubunda çox az oynayıb. O, “Pyaçentsa”, “Venetsiya”, “Kyevo”, SPAL və “Peruca” klublarında icarədə olub. Ansaldi isə 2017-nin yayından “Torino”nun uğurları üçün çalışırdı. Argentinalı futbolçu bu müddətdə meydana çıxdığı 135 oyunda 10 qol da vurub. 35 yaşlı futbolçu daha öncə “Nyuellz Old Boyz”, “Rubin”, “Zenit”, “Atletiko” , “Cenoa” və “İnter” kimi klubların da uğurları üçün çalışıb. O, Argentina yığmasında 5 oyuna çıxıb, 1 qol vurub.

“Udineze” heyətini yeni futbolçu ilə gücləndirib. Udinelilər “Uotford”un sol cinah müdafiəçisi Hassane Kamaranı transfer edib. Fransada dünyaya göz açsa da, Fil Dişi Sahili yığmasında çıxış edən müdafiəçi ilə 4+1 illik müqavilə imzalanıb. Lakin 28 yaşlı futbolçunun 2022/23 mövsümünün sonuna kimi “Uotford”da icarədə oynayacağı diqqətə çatdırılıb. İtaliya klubu bu transferə görə “Uotford”a 19 milyon avro ödəyib. Halbuki İngiltərə klubu Kamaranı bu ilin yanvarında “Nitsa”dan 4 milyon avro qarşılığında transfer etmişdi.

Kamara Fransanın “Şatoru” klubunun yetirməsidi. Peşəkar karyerasına da bu komandada başlayıb, daha sonra “Reyms”, “Kreteli” və “Nitsa”da forma geyib, yığmada 7 oyuna çıxıb.