Çempionluq uğrunda mübarizə aparmaq niyyətini gizlətməyən “Sabah” dünən heyətini yeni hücumçu ilə gücləndirib.

"Football-plus.az" xəbər verir ki, "tələbələr" Əlcəzair yığmasının heyətində keçirdiyi 19 oyunda 2 qol vuran 31 yaşlı İshak Belfodili transfer edib. O, paytaxt klubu ilə “2+1” illik müqavilə bağlayıb və 14 nömrəli formanı geyəcək.

Xatıradaq ki, Belfodil karyerası ərzində “Lion” (Fransa), “Bolonya”, “Parma”, “İnter”, “Livorno” (hamısı İtaliya), “Standard” (Belçika), “Verder”, “Hoffenhaym”, “Herta” (hamısı Almaniya) kimi tanınmış klubların formasını geyib. Əlcəzairli oyunçunun son klubu bu yay heyətindən ayrıldığı Qətərin “Əl-Qarafa”sı olub.

Bu transferlə bağlı daha bir maraqlı bilgi əldə etmişik. Belfodolin illik maaşı 800 min avro olacaq ki, bu da Azərbaycan premyer-liqasında ən yüksək qazanclardan sayılır. “Neftçi” ilə “Sabah”ın bu mövsüm, necə olur-olsun, “Qarabağ”ı çempionluq zirvəsindən endirməyə çalışdığını nəzərə alsaq, belə yüksək maaşda qəribəlik axtarmağa dəyməz. Ancaq bacaracaqlarmı – bax, budu əsas sual!

ORXAN