Milli fasilə davam edir. Bu gün yığmamız daha bir oyun keçirib. Canni de Byazinin komandası beynəlxalq yoxlama görüşündə İordaniya ilə üz-üzə gəlib.
"Football-plus.az" xəbər verir ki, “CBC Sport” bu oyunu da canlı yayınlayıb.
Beynəlxalq yoxlama görüşü
292. Azərbaycan – İordaniya 2:1
Emin Mahmudov, 45+1 (p.), Renat Dadaşov, 80 - Nizar Əl Raşdan, 57
Azərbaycan: Şahruddin Məhəmmədəliyev, Qismət Alıyev, Bəhlul Mustafazadə, Anton Krivotsyuk, Elvin Cəfərquliyev, Emin Mahmudov (k), Coşqun Diniyev, Aleksey İsayev, Ozan Can Kökçü, Musa Qurbanlı, Mahir Emreli.
İordaniya: Yazid Əbu Layla, Mustafa Eid, Yazan əl-Arab, Abdullah Nəsib, İhsan Haddad, Nizar Əl Raşdan, Raqayi Ayed, Musa Hammad, Əli Olvan, Mahmud Almardi, Həmzə əl-Dardur.
Hakimlər: ARDA KARDEŞLER, Ceyhun Sesigüzel, İbrahim Çağlar Uyarcan (hamısı Türkiyə), Tural Qurbanov (Azərbaycan).
Bakı. “Dalğa Arena”. Saat 20.00.
Yoxlama görüşlərinin nəticəsi o qədər önəmli olmasa da, FİFA reytinqinə təsir edir. Təbii ki, italiyalı mütəxəssis Canni de Byazi bunu başa düşür. Baş məşqçi İordaniya ilə matçda qələbə qazanmaq arzusunda olacaq. Belçika ilə görüşdə yaxşı təsir bağışlayaraq uduzan yığmamız ərəbləri məğlub etmək ixtiyarındadı. Yığmamızın heyətində itkilər var. Ramil Şeydayev Asiya Çempionlar Liqasındakı oyunlara yaxşı hazırlaşmaq üçün komandası “Buriram Yunayted”in düşərgəsinə yollanıb. Höccət Haqverdi isə heyətdən kənarlaşdırılıb. Ötən il noyabrın 20-də beynəlxalq yoldaşlıq oyunu çərçivəsində Skopyedə, Anton Malatinski stadionunda keçirilmiş Şimali Makedoniya - Azərbaycan qarşılaşmasında qırmızı vərəqə ilə cəzalandırılan müdafiəçi İordaniya millisinə qarşı oyunda iştirak edə bilməyəcəyi üçün yığmanın düşərgəsini tərk edib. Bu itkilərə baxmayaraq, əsas komandamız bu görüşün favoritidi. Yığmanın doğma meydanda azarkeşləri qələbə ilə sevindirəcəyinə inanmaq olar.
Ümumiyyətlə, bu komandalar indiyə kimi iki dəfə üz-üzə gəlib. Hər iki matç da İordaniyanın Əmman şəhərində keçirilib. 2004-cü ildəki görüşdə heç-heçə qeydə alınıb – 1:1. 2010-cu ildəki matçda isə yığmamız 2:0 hesabıyla qələbə qazanıb.