"Belçika Bakıya bəzi itkilərlə gəlmişdi. Buna rəğmən, sıradan bir komanda deyil və yetərincə güclü rəqibə qarşı oynadıq. Səmimi etiraf etmək lazımdı ki, millimizdə rəqabət var. Komanda bu dəfə seçmə mərhələdə ən yaxşı matçını keçirdi. Yetərincə qol imkanımız oldu, amma yararlana bilmədik. Fərdi baxımdan bəzi futbolçularımızda inkişaf hiss olunur. Əsasən də Ramil ilə Renatı vurğulayardım. Düşünürəm ki, heç-heçəyə layiq idik. Belçika kimi güclü rəbiqləri standart vəziyyətlər, ev tapşırıqları, uzaqdan zərbələr ilə cəzalandırmaq olar və bunun üzərində işləmək lazım idi. Amma səriştəsiz baş məşqçimiz var deyə bunlar nəzərə alınmadı. Ümumiyyətlə, yığmamız üç ildi De Byazi ilə geri gedir. Futbolçularımızda potensial var, legionerlərimiz artır, çempionatımızın səviyyəsi yüksəlir, bununla belə, italiyalı millini geri çəkir. Bu gün De Byazinin milidə heç bir baş məşqçi işi görünmür. Hələ bu azmış kimi, oyundan öncə və sonra mətbuat konfranslarında demaqoqluq edir, jurnalist qardaşlarımızla artıq-əskik danışır, yersiz replikalar atır. Adam çıxıb sinəsinə döyür ki, mənə qədər heç kim dalbadal 5 oyunda qalib gəlməmişdi. Ona deyən yoxdu ki, yoldaşlıq oyunlarında və seçmə mərhələdə qrupun zəiflərinə qalib gəlməklə özünü reklam etməyə dəyməz. Cari seçmə mərhələdə cəmi 1 xal toplamısan, bundan danış. Qısası, millimizin gələcəyi var, De Byazi kimi faydasız məşqçi getsə. Onun qalması ölkənin əsas komandasını daha da tənəzzülə sürükləyir. Lider məsələsinə gəlincə, hər bir komandada ən azı 2-3 oyunçu olmalıdı ki, başqalarını arxasınca aparsın. Emin Mahmudovla şəxsi tanışlığım yoxdu. Amma yaxşı futbolçudu. Təbii ki, ötən seçmə mərhələ ilə müqayisədə hazırda Emində kapitan ağırlığı görmürük. Əvvəl qollar vurmaqla komandanı arxasınca aparırdısa, hazırda bunu görmürük. Amma inanıram ki, qarşıdakı oyunlarda kapitan daha çox faydalı olacaq".