“France Football” jurnalı oktyabrın 30-da 2023-cü ilin ən yaxşı futbolçusuna ənənəvi mükafatı təqdim edəcək.

"Football-plus.az" xəbər verir ki, nüfuzlu “Goal.com” saytı isə bu nüfuzlu mükafat uğrunda mübarizədə favorit olanların reytinqini hazırlayıb. Belə görünür ki, bu il mükafat uğrunda ciddi rəqabət gedəcək. Axı çox sıx mövsümlə yanaşı, futbolçuların Qətərdə keçirilən DÇ-2022-dəki çıxışı da nəzərə alınacaq. Beləliklə:

9-cu yer. Xulian Alvares
“Mançester Siti”nin və Argentina yığmasının 23 yaşlı hücumçusu İngiltərə kubokunun, premyer-liqanın, Çempionlar Liqasının və dünya çempionatının qalibidi. Əla kolleksiyadı – bəs onda Xulian niyə yalnız 9-cu yerdədi? Səbəb aydındı: heç bir titulun qazanmasında baş rol oynamayıb. Qətərdə Messi parlayıbsa, “Siti”də Xulian rotasiya oyunçusu olub. Alvaresin mövsüm ərzindəki statistikası reytinqdəki yerinə uyğun gəlir – “şəhərlilər”in heyətində 49 oyunda 17 qol və 5 ötürmə, dünya çempionatında 4 qol.
8-ci yer. Viktor Osimhen
“Napoli”nin forvardının gözəl şəxsi göstəriciləri (A seriyasının 32 oyununda 26+5) ilə yanaşı, klubun uğurlarında böyük rolu da nəzərə alınıb. Osimhen “Napoli”ni tam yeni səviyyəyə qaldıran və ona Dieqo Maradonanın dönəmindən bəri ilk çempionluğu qazandıran futbolçuların önündə gəlir. 24 yaşlı hücumçu bu parlaq tarixçədə əsas rollardan birini oynayıb və yəqin tərəqqisi davam edəcək.
7-ci yer. İlkay Gündoğan
“Siti”nin (indi isə “Barselona”nın) 32 yaşlı yarımmüdafiəçisi kosmik statistika ilə yadda qalmayıb, Qətərdə isə Almaniya yığmasıyla uğursuzluğa düçar olub. Ancaq birincisi, Gündoğan trebl edib, ikincisi, bu uğurlarda heç də sonuncu rolu oynamayıb:
• final qarışıq Çempionlar Liqasındakı bütün oyunlarda iştirak edib;
• İngiltərə kubokunda cəmi iki qol vurub, ancaq ikisini də finalda. Özü də Mançester derbisində;
• premyer-liqada keçirdiyi 31 oyunda 8+5 göstəricisi ilə yadda qalıb. Əla rəqəmlərdi! Ancaq Gündoğanın epizodlarla parladığını nəzərə alsaq, onu 7-ci yerdən yuxarıda qoymaq ədalətsizlik olardı.
6-cı yer. Rodri
“Siti”ni bu mövsüm 27 yaşlı dayaq yarımmüdafiəçisiz təsəvvür etmək mümkünsüzdü. Bütün turnirlərdə “şəhərlilər”in heyətində 56 oyun, ÇL-in finalında qələbə topu və əlbəttə, trebl. Bu oğlan top-10-a düşməsəydi, vicdansızlıq olardı. Rodri etiraf edir ki, “İnter”in qapısına vurduğu qola bəlkə də 5 min dəfə baxıb. Bundan sonrası onun üçün o qədər də önəmli deyil.
5-ci yer. Kevin de Bruyne
“Siti”nin belçikalı yarımmüdafiəçisinin ilk “5-liy”ə düşməməsi mümkün deyil. 32 yaşlı futbolçu bu qədər titul qazanan komandanın lideri olmaqla əfsanəvi mövsüm keçirdi. Mövsüm ərzində 31 məhsuldar ötürmə qeyri-adi göstəricidi və yalnız ÇL-in finalındakı zədə onu 5-ci yerdən yuxarı qoymağa imkan vermir.
4-cü yer. Vinisius
Reaktiv braziliyalı məhz 2022/23 mövsümündə qəti şəkildə Mbappe və Holann ilə ayaqlaşmağa qadir olan, dünya səviyyəki futbolçu kimi qəbul olunmağa başladı. Qənimət sayına (Kral kuboku, klub dünya çempionluğu, Avropa Superkuboku) görə “Siti”nin ulduzlarına uduzsa da, şəxsi statistikası, sadəcə, möhtəşəmdi – “Real”ın heyətində 23+21, Braziliya yığması ilə dünya çempionatında 1+2. Vinisius öz mövqeyində artıq dünyanın ən yaxşılarındandı, belə görünür ki, qarşıdakı illərdə daim “Qızıl top” uğrunda mübarizə aparan futbolçular siyahısında olacaq.
3-cü yer. Kilian Mbappe
Son vaxtlar belə görünür ki, 24 yaşlı fransalı futbol oynamaqdan daha çox qalmaqalların mərkəzindədi. Əlbəttə, tam belə deyil. Kilian ötən mövsüm 53 qop vurub və 13 məhsuldar ötürmə verib – qeyri-adi məhsuldarlıqdı! Xüsusən də 12+3 göstəricisinin DÇ-də qeydə alındığını unutmayaq. Üstəlik: Mbappe DÇ-nin finalında het-trik edib və oyunsonrası penalti seriyasında da fərqlənib. Ancaq 2-ci dəfə dünya çempionu ola bilməyib. PSJ-də də vəziyyət oxşardı: Liqa 1-də parlayıb, ancaq ÇL-i qazanmaq şansını yenə də əldən verib. Fərdi baxımdan Mbappenin tayı-bərabəri yoxdu – ancaq “Qızıl top”u qazanmaq üçün titul da vacibdi.
2-ci yer. Erlinq Holann
Norveç DÇ-yə vəsiqə qazana bilmədi, bu üzdən Holann bütün enerjisini klub mövsümündə xərclədi. 23 yaşlı forvard “Siti”də 52 qol vurub, bir neçə rekordu yeniləyib, trebl edib. Özü də İngiltərədəki debüt mövsümündə. Sadəcə, nağıldı. Ancaq bir “əmma” var: daha parlaq süjetə malik argentinalı...
1-ci yer. Lionel Messi
Messi çox uzun mövsüm keçiri: indi çıxış etdiyi MLS-də 2022/23 mövsümü bitməyib, odu ki, “İnter Mayami”dəki məhsuldar hərəkətləri də Parisdəki uğurlarına əlavə olunur. “Qol+ötürmə” sxemi üzrə 32+25 – ağlasığmaz statistikadı, lap iki komandanın heyətində olsa da. Ancaq Leo “Qızıl top” uğrunda mübarizədə təkcə rəqəmlərə görə favorit sayılmır. Məhz Messi Argentinaya dünya çempionatının “qızıl”ını qazandırıb, Qətər turnirinin ən yaxşısı sayılıb. “Qızıl top”un səsverməsində belə məqamlar həmişə böyük önəm daşıyıb. Bu üzdən “Goal.com” belə hesab edir ki, argentinalının 8-ci dəfə mükafatı qazanması tam realdı. Buna əmin olmaq üçün oktyabrın sonunun gözləməliyik.

21-ci əsrdə* “Qızıl top”un bütün qalibləri
il oyunçu vətəndaşlıq klub
2001 Maykl Ouen İngiltərə Liverpul
2002 Ronaldo Braziliya Real
2003 Pavel Nedved Çexiya Yuventus
2004 Andrey Şevçenko Ukrayna Milan
2005 Ronaldinyo Braziliya Barselona
2006 Fabio Kannavaro İtaliya Real
2007 Kaka Braziliya Milan
2008 Kriştiano Ronaldo Portuqaliya Mançester Yunayted
2009 Lionel Messi Argentina Barselona
2010 Lionel Messi Argentina Barselona
2011 Lionel Messi Argentina Barselona
2012 Lionel Messi Argentina Barselona
2013 Kriştiano Ronaldo Portuqaliya Real
2014 Kriştiano Ronaldo Portuqaliya Real
2015 Lionel Messi Argentina Barselona
2016 Kriştiano Ronaldo Portuqaliya Real
2017 Kriştiano Ronaldo Portuqaliya Real
2018 Luka Modriç Xorvatiya Real
2019 Lionel Messi Argentina Barselona
2020 təqdim olunmayıb
2021 Lionel Messi Argentina PSJ
2022 Kərim Benzema Fransa Real
* 2010-15 aralığında “France Football” ilə FİFA “FİFA-nın “Qızıl top”u” adlanan mükafatı birgə təqdim edib.