Misli premyer-liqasında 5-ci tur arxada qaldı. Özü də necə?!

Bu turda baş verən sensasiyalar hamını təəccübləndirdi. Bizim çempionatda favoritlərin büdrəməsini çox görmüşük. Amma birdən-birə üç favrotin xalsız qalması, “Kəpəz”in doğma meydanda “Araz Naxçıvan”a boyun əyməsi, “Sumqayıt”ın ilk məğlubiyyətini “gənclik şəhəri”ndə “Neftçi”dən alması çətin proqnozlaşdırılardı. Bu hadisələrin hamısının bir-birinin ardınca baş verməsi, eyni tura sığması şəxsən məni çox təəccübləndirdi. Rəngləri tündləşdirmədən, hadisələri qəlizləşdirmədən başverənləri, daha doğrusu, qeydə alınan nəticələri incələməyə çalışaq.

Başlayaq elə “Sabah”ın Masazırda “Turan Tovuz”a uduzmasından. Tovuzlular ötən tur “Səbail”ə boyun əymişdi. Özü də məzmunsuz, səbatsız bir oyunla. Yeni mövsümdə doğma meydanda ilk oyununu keçirən, azarkeşlərini sevindirməyə borclu olan “Turan Tovuz” bu mənəvi məsuliyyətin öhdəsindən gələ bilmədi. Özü də rəqib heç də güclülərdən sayılmayan “Səbail” idi. “Dənizçilər”i o qədər də güclü saymamağım sizə təəccüblü gəlməsin. Ən azı ona görə haqlıyam ki, Şahin Diniyevin komandası Tovuz səfərinə qədər qələbə qazanmamışdı. Deməli, Tovuzdakı görüşdə “Turan Tovuz” üçün qələbə qazanmaq o qədər də çətin olmamalıydı. Nəticə isə əksinə oldu. İş o yerə gəldi çatdı ki, həmin məğlubiyyətdən sonra klubun İdarə Heyətinin sədri Ehtiram Quliyev mətbuat konfransı keçirdi, mövcud şəraitdən şikayətlənməklə “Turan Tovuz”un böyük hədəflər uğrunda mübarizə aparmağa hazır olmadığını bir növ azarkeşlərə qəbul etdirməyə çalışdı.

Məlum mətbuat konfransında Ehtiram bəy maraqlı bir statistikaya diqqəti çəkmiş, komandasının doğma meydanda oynamağa çətinlik çəkdiyini vurğulamışdı. Buna da səbəb kimi Tovuz stadionunun süni örtüyünü göstərmişdi. Cəmi bir tur sonra Quliyevin bu sözləri təsdiqini tapdı. “Turan Tovuz” Masazırdakı təbii ot örtüklü stadionda meydan sahiblərini böyük hesabla məğlub etdi. Bəli, çempionluğa iddia edən, ölkənin ən güclü 2-3 klubundan biri sayılan “Sabah”ın qapısına üç cavabsız top vurmaq sıradan hadisə deyildi. Amma bu uğuru bütünlüklə “Bank Respublika Arena”nın ot örtüyünün keyfiyyətinə yazmaq da olmur. “Sabah” ötən mövsümün gedişində də oxşar gərginlikdən əziyyət çəkirdi. Bu dəfə komandanın heyətində gərginlik qarışıq depressiya daha erkən başlayıb. Düzdü, Kaşukla Mikelsin gedişi də nəticələrdə rol oynayır. Yenilər gedənlərin yerini doldura bilməyib. Elə komandanın baş məşqçisi Murad Musayevin də bir qədər soyuqqanlı olmasına, konsentrasiyasını faydalı işlərə yönəltməsinə ehtiyac var. Əks halda “Sabah”ın toparlanması, “qara zolaq”dan çıxması asan olmayacaq. Bəli, Amin Seydiyevin yoxluğu da komanda üçün ciddi itkidi. Gənc futbolçu da elə baş məşqçisi kimi yersiz gərginlikdən, əsəblərini idarə edə bilməməkdən əziyyət çəkir.
Həmkarından fərqli Qurban Qurbanovun əsəbləri sakitdi. Ötən tur “Kəpəz”lə heç-heçə, bu tur “Səbail”ə məğlubiyyət “Qarabağ”ın çalışdırıcısını özündən çıxara bilməyib. Heç inanmıram da ki, Qurban bəy əsəblərinə yenik düşə, məğlubiyyətin günahını hakimlərdə görə, emosiyalarını çılğınlıqla biruzə verə. “Sabah”dan fərqli “Qarabağ” avrokubok mübarizəsini davam etdirir. “Köhlən atlar” geridə qoyduğumuz həftə Avropa Liqasının qrup mərhələsinə vəsiqəni rəsmiləşdirdi. Qitənin nüfuzunə görə ikinci dərəcəli klub turnirində yenidən təmsilçimizin olması hamımızı sevindirir.

Amma görünən odu ki, iki cəbhədə mübarizə aparmaq “Qarabağ” üçün heç də asan deyil. Xüsusən də bu mövsüm. Yerli futbolçular Ramil Şeydayevlə Musa Qurbanlının gedişi Qurban Qurbanovun qayğılarını artırıb. Çalışdırıcı nə yerli, nə də legioner futbolçuların köməyi ilə bu ciddi boşluğu doldura bilir. Limitin gətirdiyi çətinlikləri də bura əlavə edəndə… Bitmək bilməyən rotasiyalar, sıx oyun qrafiki Qurban bəyin işini qəlizləşdirir. Bu mənada həm təsnifat mərhələsinin bitməsinin, həm də milli komandaların oyunu ilə bağlı yaranan fasilənin yerinə düşdüyünü deməliyik. “Qarabağ” nəfəs almaq, səhvlərdən nəticə çıxarmaq imkanı qazanıb. Sözsüz, indiki məqamda bundan qazanan “Səbail”, “Kəpəz” kimi rəqiblər oldu. Onlar qızıldan qiymətli xallar qazandılar.

“Zirə” də bu tur dayandı. “Sabah”la “Qarabağ”dan fərqli qəsəbə təmsilçisi ilk yenilgisini aldı. Özü də bu mövsüm yenilgiləri sıralayan “Qəbələ” məhz lideri büdrətməklə 3 xalın sevincini yaşadı. Düzdü, Rəşad Sadıqovun komandası lider kürsüsündən düşməyib. Lakin bu məğlubiyyət onu göstərir ki, “Zirə”ni uğura aparmalı yol heç də hamar görünmür. Həm fiziki, həm də psixoloji baxımdan gərgin mübarizəyə hazır olmaq lazımdı. Bir sözlə, Azərbaycan çempionatında heç kimi işin rəvan getmir, hər şey bir andaca baş-ayaq ola bilir. Bunun yaxşı, yoxsa pis olduğunu isə zaman göstərəcək.

AMAL